Şəfiqə Məmmədova haqqında maraqlı məlumatları sizinlə bölüşüruk.
Şəfiqə Məmmədova 30 mart 1945-ci ildə Dağıstanın Dərbənd şəhərində doğulub. Azərbaycan Dövlət Teatr İnstitutunun Musiqili Komediya aktyorluğu fakültəsini 1968-ci ildə bitirib.
Elə həmin il Azərbaycan Milli Dram Teatrının truppasına qəbul olunub. 1980-ci ildə teatrdan uzaqlaşaraq bir müddət Azərbaycan Dövlət Mədəniyyət və İncəsənət Universitetində pedaqoji fəaliyyətə başlayıb.
Şəfiqə Məmmədova “Qaraca Qız” (Pəricahan xanım), “Dədə Qorqud” (Burla xatun), “İstintaq” (Gülya), “Bizim Cəbiş müəllim” (Cəbişin arvadı), “Ad günü” (Fəridə), “Çarvadarların izi ilə” (Səriyyə) bədii filmlərinə çəkilib.
Aktrisa Uilyam Şekspirin “Hamlet” (Gertruda), Aleksandr Şirvanzadənin “Nakam qız” (Sona), Lev Tolstoyun “Canlı meyit” (Maşa), Çingiz Aytmatovun “Ana torpağı” (Cenşengülün arvadı), Hüseyn Cavidin “Xəyyam” (Sevda), Cəlil Məmmədquluzadənin “Dəli yığıncağı” (Pırpız Sona), Fridrix Şillerin “Məkr və məhəbbət” (Ledi Milford), Yucin O’Nilin “Qızıl” (Süzen) və s. kimi faciələrində cazibədar səhnə obrazları yaradıb.
Şəfiqə Məmmədova Anarın “Şəhərin yay günləri” pyesinin tamaşasındakı Dilarə roluna görə Azərbaycan Dövlət mükafatına (1980), Rasim Ocaqovun çəkdiyi “İstintaq” filmindəki müstəntiqin arvadı obrazına görə isə SSRİ Dövlət mükafatına (1981) layiq görülüb.
Aktrisa 1974 -cü ildə “Azərbaycanın əməkdar artisti”, 1982-ci ildə “Azərbaycan SSR xalq artisti”, 2013-cü ildə “Şərəf” ordeni”, 2018-ci ildə “Cəfər Cabbarlı mükafatı” və 2020-ci ildə isə “I dərəcəli “Əmək” ordeni” qazanıb.
1995-2000-ci illərdə Azərbaycan Respublikası I çağırış Milli Məclisinin deputatı olub.
Qeyd edək ki, Şəfiqə Məmmədovanın qardaşı Məmməd Məmmədov da aktyor olub. Şəfiqə Məmmədova Azərbaycanın görkəmli teatr rejissoru Mehdi Məmmədovun həyat yoldaşı olub. Mehdi Məmmədovla birgə nikahından Ülvi adlı oğlu var. Ülvi Mehdi də valideynlərinin sənət ömrünü davam etdirir. Kinossenarist kimi fəaliyyət göstərir.
