Mingəçevir Dövlət Universitetində (MDU) yeni tədris ili ilə bağlı hazırlıqlar davam edərkən, abituriyentlər üçün də həyəcanlı gözlənti günləri yaşanır. Ali məktəblərə qəbulun nəticələrinin açıqlanmasına sayılı günlər qaldığı bir vaxtda MDU rektoru Anar Eminov abituriyentlərə müraciət edib.
Rektor öz müraciətində nəticələrini gözləyən gənclərin keçirdiyi həyəcanı bölüşdüklərini vurğulayıb və universitetin yeni tələbələrini böyük bir ailənin üzvü kimi qarşılamağa hazır olduğunu bildirib.
“Əziz abituriyentlər, nəticələrin açıqlanmasına cəmi bir neçə gün qalıb. İnanın, bu həyəcanı sizlər qədər biz də yaşayırıq”, – deyə Anar Eminov qeyd edib.
Rektor müraciətində abituriyentlərin aylarla göstərdiyi zəhmətə, gecə-gündüz çəkdikləri əziyyətə və böyük arzularına diqqət çəkərək, onların həyatında mühüm mərhələlərdən birinin artıq yaxınlaşdığını bildirib.
Onun sözlərinə görə, gənclərin uzun müddət hazırlaşaraq gözlədiyi nəticələrin elan olunacağı günə çox az vaxt qalıb. Anar Eminov hər bir abituriyentə uğurlar arzulayıb və yaxın günlərdə bir çox gəncin sevincini birlikdə paylaşacaqlarına ümid etdiyini bildirib.
“Ümid edirəm ki, yaxın günlərdə çoxunuzun sevincini birlikdə paylaşacağıq”, – rektor vurğulayıb.
Anar Eminov həmçinin Mingəçevir Dövlət Universitetinin yeni tələbələri qəbul etməyə hazır olduğunu xüsusi qeyd edib. Rektor abituriyentlərə müraciətində universitetin yalnız təhsil müəssisəsi deyil, eyni zamanda tələbələrin özlərini böyük bir ailənin parçası hiss edə biləcəkləri bir mühit olduğunu ifadə edib.
“Mingəçevir Dövlət Universiteti olaraq sizi böyük bir ailənin üzvü kimi qarşılamağa hazırıq. Uğurlarınız bol olsun! MDU sizi gözləyir!” – deyə Anar Eminov müraciətini tamamlayıb.
Qeyd edək ki, qəbul nəticələrinin açıqlanması minlərlə abituriyentin səbirsizliklə gözlədiyi əsas məqamlardan biridir. Nəticələrin elanından sonra gənclər topladıqları ballara uyğun olaraq ali təhsil müəssisələrində ixtisas seçimlərini müəyyənləşdirəcəklər.
Mingəçevir Dövlət Universitetinin rektorunun bu müraciəti isə xüsusilə MDU-da təhsil almağı planlaşdıran abituriyentlərə mənəvi dəstək xarakteri daşıyır. Universitet rəhbərliyi yeni tədris ilində tələbə adını qazanacaq gəncləri qarşılayacağı günü səbirsizliklə gözləyir.
Esmira Hidayətova, Mingəçevir
