22 İyul – Azərbaycanda Milli Mətbuat və Jurnalistika Günü münasibətilə Mingəçevir Turizm Kollecinin direktoru Kamal Əhmədov şəhərin restoranlarından birində bölgə jurnalistlərinin şərəfinə səhər süfrəsi təşkil edib.
Səmimi şəraitdə keçən görüşdə media ilə təhsil müəssisələri arasında əməkdaşlığın inkişafı, bölgə mediasının fəaliyyəti, cəmiyyətin düzgün məlumatlandırılmasında jurnalistikanın rolu və gələcək birgə fəaliyyət istiqamətləri ətrafında fikir mübadiləsi aparılıb.
Çıxış edən Kamal Əhmədov jurnalistləri peşə bayramı münasibətilə təbrik edərək onların cəmiyyətin obyektiv məlumatlandırılması və ictimai rəyin formalaşmasında mühüm rol oynadıqlarını vurğulayıb. O bildirib ki, Mingəçevir Turizm Kolleci bundan sonra da bölgə mediası ilə sıx əməkdaşlığını davam etdirəcək, təhsil müəssisəsində həyata keçirilən layihələr, tədris prosesi və tələbələrin nailiyyətləri barədə ictimaiyyətin operativ məlumatlandırılmasına xüsusi önəm veriləcək.
Görüşdə iştirak edən jurnalistlər də belə təşəbbüslərin media ilə təhsil müəssisələri arasında əlaqələrin daha da möhkəmlənməsinə xidmət etdiyini bildirərək göstərilən diqqət və ehtirama görə təşəkkürlərini ifadə ediblər.
Tədbirdə Mingəçevir şəhərindən olan jurnalistlər Esmira Hidayətova, Fərman Nəbiyev, Yeganə Nəbiyeva, Mirsədi Daşdəmirov, Mətanət Məmmədova, İxtiyar Həsənli, İnqilab Şirinbəyli, eləcə də kollecin müəllim kollektivi iştirak edib.
Idealxeber.az
