Mingəçevir şəhərində əhalinin sağlamlığının və təhlükəsizliyinin qorunması, həmçinin isti mövsümdə ilan və digər zərərli həşəratların yarada biləcəyi təhlükələrin qarşısının alınması istiqamətində profilaktik tədbirlər davam etdirilir.
Bu məqsədlə Mingəçevir şəhər Dezinfeksiya Stansiyasının əməkdaşları tərəfindən 21 avqust 2026-cı il tarixində Zəngəzur küçəsində ilan və digər zərərli həşəratlara qarşı növbəti profilaktik dərmanlama və dezinfeksiya işləri həyata keçirilib.
Məlumata görə, tədbirlər şəhər sakinlərinin müraciətlərinin, eləcə də ərazidə zərərvericilərin yayılmasının qarşısının alınması məqsədilə təşkil olunub. İşlər zamanı ərazinin sanitariya vəziyyətinin yaxşılaşdırılması və əhali üçün potensial təhlükə yarada biləcək ilan, həşərat və digər zərərvericilərin qarşısının alınması əsas hədəf kimi götürülüb.
Qeyd edək ki, bu istiqamətdə görülən tədbirlər birdəfəlik xarakter daşımır. Şəhərin müxtəlif ərazilərində, xüsusilə yaşayış məntəqələri, məhəllələr və zərərvericilərin müşahidə oluna biləcəyi sahələrdə dərmanlama və profilaktik dezinfeksiya işləri mütəmadi olaraq, aylıq əsasda həyata keçirilir.
Tədbirlərin keçirilməsi şəhər sakinlərinin sağlamlığının qorunması və ətraf mühit amillərinin insan orqanizminə mənfi təsirinin minimuma endirilməsi baxımından mühüm əhəmiyyət daşıyır.
Mingəçevir şəhər İcra Hakimiyyətinin və Mingəçevir Gigiyena və Epidemiologiya Mərkəzinin (GEM) diqqətində saxlanılan əsas məsələlərdən biri də sanitariya-epidemioloji salamatlığın təmin edilməsi, əhalinin sağlamlığı üçün təhlükə yarada biləcək amillərin vaxtında müəyyənləşdirilməsi və onların aradan qaldırılması istiqamətində qabaqlayıcı tədbirlərin görülməsidir.
Görülən işlər “Sanitariya-epidemioloji salamatlıq haqqında” və “Əhalinin sağlamlığının qorunması haqqında” Azərbaycan Respublikasının qanunlarının tələbləri çərçivəsində əhalinin sağlamlığının mühafizəsinə və təhlükəsiz yaşayış mühitinin təmin edilməsinə yönəlib.
Xüsusilə yay aylarında havaların temperaturunun yüksəlməsi ilə əlaqədar ilan və müxtəlif həşəratların aktivliyinin artması nəzərə alınaraq, belə profilaktik tədbirlərin vaxtında və mütəmadi şəkildə həyata keçirilməsi mühüm əhəmiyyət kəsb edir.
Bildirək ki, Zəngəzur küçəsində aparılan işlər sosial şəbəkələrdə ictimai fəal Anar Mehdiyevin ərazi ilə bağlı müraciətindən sonra şəhər İcra Hakimiyyətinin tapşırığı əsasında təşkil olunub.
Sakinlərin müraciətlərinin aidiyyəti qurumlar tərəfindən nəzərə alınması və problemin yerində araşdırılaraq müvafiq tədbirlərin görülməsi şəhərdə sanitariya vəziyyətinin qorunmasına və əhalinin narahatlığının aradan qaldırılmasına xidmət edir.
Aidiyyəti qurumlar tərəfindən bu istiqamətdə profilaktik tədbirlərin bundan sonra da davam etdirilməsi nəzərdə tutulur.
Esmira Hidayətova, Mingəçevir
