Mingəçevirin ədəbi mühitində özünəməxsus imzası ilə seçilən gənc şair Nərmin Əliyeva, yaradıcılığının ən məhsuldar dövrünü vətənə və qəhrəmanlıq tariximizə həsr edib. Onun qələmi sadəcə misralardan ibarət deyil; bu, gələcək nəsillərə ötürülən bir milli-mənəvi mesaj və vətənpərvərlik yolunun işığıdır.
Nərmin xanımın poetik dünyasının mərkəzində vətən sevgisi və milli kimliyimiz dayanır. O, şəhidlərin anım mərasimlərində, dövlət əhəmiyyətli tədbirlərdə fəal iştirak edərək, gənclərin milli ruhda formalaşması üçün əlindən gələni əsirgəmir. Şair öz həyat fəlsəfəsini belə ifadə edir:
”Həyatımı iki müqəddəs sahənin – elmin və sözün vəhdəti üzərində qurmuşam. İnanıram ki, elm insanın düşüncəsini formalaşdırır, poeziya isə onun ruhunu zənginləşdirir. Yaradıcılığım vasitəsilə gələcək nəsillərin milli dəyərlərə bağlı, vətənpərvər yetişməsinə töhfə vermək ən böyük amalımızdır.”
Daha öncə oxucuların ixtiyarına verdiyi “Ürəyimdə közərən söz” adlı şeirlər kitabı ilə ədəbi ictimaiyyətin rəğbətini qazanan Nərmin Əliyeva, indi daha böyük və məsuliyyətli bir missiyanın astanasındadır.
Nərmin xanım bu dəfə qələmini Azərbaycanın Milli Qəhrəmanı Natiq Qasımovun ölməz xatirəsinə həsr etmək qərarına gəlib. Bu müqəddəs niyyətlə qəhrəmanın ailə üzvləri ilə görüşən şair, öz planlarını bölüşüb. Qəhrəmanın qardaşı Nofəl Qasımov bu təşəbbüsü yüksək qiymətləndirərək, şairə xeyir-duasını verib:
“Qəhrəmanlarımızı unutmaq olmaz. Onların bizə əmanət qoyduğu bu Vətəni sevmək, qorumaq və bu sevgini gələcək nəsillərə aşılamaq hər birimizin müqəddəs borcudur.”
Nofəl Qasımovun səmimi dəstəyi və xoş sözləri Nərmin xanımı daha da ruhlandırıb. O, qəhrəmanlıq tariximizin öyrənilməsi və tanıdılması yolunda əzmlə çalışacağını vurğulayaraq: “Mən də qələmim və fəaliyyətimlə bu müqəddəs yolda xidmət etməyə davam edəcəyəm,” – deyə bildirib.
Biz də öz növbəmizdə, milli ruhlu vətənpərvər şairimiz Nərmin Əliyevaya bu məsuliyyətli yolda uğurlar arzulayırıq. İnanırıq ki, onun qələmindən çıxan yeni əsərlər Natiq Qasımov kimi qəhrəmanlarımızın ölməzlik dastana çevrilməsinə və gənc nəslin qəlbində vətən eşqinin daha gur yanmasına vasitəçi olacaq.
Esmira Hidayətova, Mingəçevir
