Mingəçevir Dövlət Universitetində (MDU) 2025/2026-cı tədris ili üzrə Elmi Şuranın növbəti və geniştərkibli iclası keçirilib. İclas 6 fevral 2026-cı il tarixində baş tutub. Toplantıda Elmi Şura üzvləri ilə yanaşı, universitetin struktur bölmə rəhbərləri də iştirak ediblər.
İclası giriş sözü ilə açan MDU-nun rektoru Anar Eminov gündəlikdə duran məsələlər barədə iştirakçılara ətraflı məlumat verib və müzakirələrin əhəmiyyətini vurğulayıb.
Gündəlikdə ilk olaraq 2025/2026-cı tədris ilinin payız imtahan sessiyasının nəticələrinə dair hesabat dinlənilib. Hesabatda imtahanların nəticələri, mövcud vəziyyət və qarşıda duran əsas vəzifələr diqqətə çatdırılıb. Məsələ Elmi Şura üzvlərinin təklif və tövsiyələri nəzərə alınmaqla qəbul edilib.
Daha sonra universitetdə təcrübə və karyera inkişafı sahəsində görülən işlərə dair hesabat təqdim olunub. Hesabatda tələbə və magistrantların istehsalat və pedaqoji təcrübələrinin təşkili, təcrübə yerlərinin və rəhbərlərin müəyyənləşdirilməsi, eləcə də karyera imkanlarının genişləndirilməsi istiqamətində həyata keçirilən tədbirlər barədə məlumat verilib və müzakirələr aparılıb.
İclas cari məsələlərin müzakirəsi ilə davam edib. Bu çərçivədə Apellyasiya Komissiyasının hesabatı dinlənilib, edilən müraciətlərin statistik göstəriciləri Elmi Şuranın diqqətinə çatdırılıb. Eyni zamanda, 2025/2026-cı tədris ilinin payız imtahan sessiyasında 100 bal toplayan tələbələrə, həmçinin Orhun Mübadilə Proqramı çərçivəsində keçirilən müsabiqələrin qaliblərinə 500 manat məbləğində rektorun birdəfəlik təqaüdünün verilməsi barədə qərar qəbul edilib.
Bununla yanaşı, Mingəçevir Dövlət Universiteti ilə Azərbaycan Dövlət Neft və Sənaye Universiteti arasında əməkdaşlığın genişləndirilməsi, tələbə və müəllim mübadiləsinin təşkili məqsədilə İşçi Qrupunun yaradılması məsələsi müzakirə olunaraq təsdiq edilib.
İclasda Elmi-Metodiki Şuranın yeni tərkibinin təsdiqi, bakalavr və magistratura təhsil səviyyələri üzrə imtahan və tədris prosesinə dair bir sıra normativ məsələlər də müzakirə edilib. Xüsusilə imtahan qayda pozuntuları ilə bağlı tətbiq edilən mexanizmlər, magistratura səviyyəsi üzrə fənn proqramlarının təsdiqi və bakalavriat təhsil səviyyəsində imtahan prosesində qayda pozuntusuna yol verən tələbələrə münasibətdə tətbiq ediləcək prosedurlar barədə qərarlar qəbul olunub.
İclasın sonunda rektor Anar Eminov 2025/2026-cı tədris ilinin payız semestrinin imtahan sessiyasının obyektiv və şəffaf şəkildə təşkilinə görə universitetin akademik və inzibati heyətinə təşəkkür edib.
Esmira Hidayətova, Mingəçevir
