30 oktyabr 2026-cı il tarixində Mingəçevirdə məişət zorakılığının qarşısının alınması, bu istiqamətdə ictimai maarifləndirmənin gücləndirilməsi və cəmiyyətdə sağlam sosial münasibətlərin formalaşdırılması məqsədilə maarifləndirici görüş keçirilib.
Şəhər İcra Hakimiyyəti başçısı yanında fəaliyyət göstərən “Məişət zorakılığının qarşısının alınması sahəsində monitorinq və əlaqələndirmə qrupu”nun təşkilatçılığı, Mingəçevir Dövlət Universitetinin (MDU) dəstəyi ilə baş tutan tədbirdə İcra Hakimiyyətinin rəsmiləri, universitetin tələbələri və ictimaiyyət nümayəndələri iştirak ediblər.
Görüşdə məişət zorakılığının cəmiyyət üçün yaratdığı ciddi sosial problemlər, onun ailə institutuna, fərdlərin psixoloji vəziyyətinə və xüsusilə qadınların və uşaqların həyatına mənfi təsirləri ətrafında geniş fikir mübadiləsi aparılıb. Bildirilib ki, məişət zorakılığı yalnız fiziki şiddətlə məhdudlaşmır, psixoloji təzyiq, təhdid, təhqir, iqtisadi asılılıq yaratmaq və digər davranış formaları da bu anlayışa daxildir.
Tədbirdə çıxış edən monitorinq və əlaqələndirmə qrupunun katibi Səbuhi Hüseynov məişət zorakılığının qarşısının alınması istiqamətində görülən işlər, mövcud qanunvericiliyin tələbləri və dövlət qurumlarının bu sahədə həyata keçirdiyi tədbirlər barədə ətraflı məlumat verib. O, zorakılıq hallarının vaxtında aşkarlanmasının, müraciətlərin diqqətlə araşdırılmasının və zərərçəkmiş şəxslərə lazımi dəstəyin göstərilməsinin əhəmiyyətini vurğulayıb.
Şəhər İcra Hakimiyyəti başçısı aparatının aparıcı məsləhətçisi Qorxmaz Abbaszadə isə çıxışında məişət zorakılığına qarşı mübarizədə dövlət qurumları ilə yanaşı, ailələrin, təhsil müəssisələrinin və bütövlükdə cəmiyyətin üzərinə düşən məsuliyyətdən danışıb. Qeyd olunub ki, bu problemin aradan qaldırılması üçün hüquqi mexanizmlərlə yanaşı, maarifləndirmə işlərinin də davamlı və sistemli şəkildə aparılması vacibdir.
Görüşdə psixoloq Aynaz Quliyeva məişət zorakılığının psixoloji tərəflərinə toxunaraq, zorakılıq münasibətlərində müşahidə olunan nəzarət, manipulyasiya, emosional təzyiq və psixoloji asılılıq mexanizmlərini izah edib. O, bu cür davranışların insanın özünəinamına, qərarvermə qabiliyyətinə və sosial həyatına ciddi təsir göstərdiyini diqqətə çatdırıb.
Tədbirin əsas diqqət çəkən məqamlarından biri də tələbələrin mövzu ətrafında müzakirələrə cəlb olunması olub. Gənclərə zorakılığın əlamətlərinin tanınması, belə hallarla qarşılaşdıqda düzgün davranış qaydaları, hüquqi müdafiə imkanları və aidiyyəti qurumlara müraciət mexanizmləri barədə məlumat verilib. Sonda iştirakçıların sualları cavablandırılıb, onları maraqlandıran məsələlər ətrafında fikir mübadiləsi aparılıb.
Qeyd edək ki, Mingəçevir Dövlət Universitetinin rektoru Anar Eminovun 9 aprel 2025-ci il tarixində vəzifəyə təyin olunmasından sonra ali təhsil müəssisəsində yalnız akademik və elmi fəaliyyətin deyil, eyni zamanda sosial yönümlü, ictimai əhəmiyyət daşıyan maarifləndirici tədbirlərin də geniş vüsət aldığı müşahidə olunur. Universitetdə tələbələrin ictimai proseslərdə fəallığının artırılması, sosial problemlərə həssas yanaşmanın formalaşdırılması, hüquqi və psixoloji maarifləndirmənin gücləndirilməsi istiqamətində keçirilən görüşlər MDU-nun cəmiyyətlə əlaqələrinin inkişafına xidmət edir. Bu baxımdan məişət zorakılığına qarşı təşkil olunan maarifləndirici görüş də universitetin sosial məsuliyyət və ictimai fəallıq istiqamətindəki fəaliyyətinin növbəti nümunəsi kimi diqqət çəkir.
Esmira Hidayətova, Mingəçevir
