Xocalı soyqırımının 34-cü ildönümü ilə əlaqədar olaraq, Mingəçevir şəhər ictimaiyyəti ilə yanaşı, Mingəçevir Dövlət Universitetinin kollektivi də faciə qurbanlarının xatirəsini dərin hüznlə yad edir.
Universitetin rektoru Anar Eminov Xocalı soyqırımı qurbanlarının ailələrinə, yaxınlarına və bütün Azərbaycan xalqına dərin hüznlə başsağlığı verib.
Rektor başsağlığı müraciətində bildirib ki, Xocalı soyqırımı xalqımızın tarixində silinməz iz qoymuş, insanlığa qarşı törədilmiş ən ağır cinayətlərdən biridir. O qeyd edib ki, günahsız insanların – uşaqların, qadınların və qocaların xüsusi amansızlıqla qətlə yetirilməsi bəşər tarixinin ən qanlı səhifələrindəndir.
Anar Eminov vurğulayıb ki, Xocalı qurbanlarının əziz xatirəsi daim ehtiramla anılacaq, faciə ilə bağlı həqiqətlərin gələcək nəsillərə çatdırılması hər bir azərbaycanlının mənəvi borcudur. O bildirib ki, universitet kollektivi də bu istiqamətdə maarifləndirici tədbirlərin keçirilməsini davam etdirəcək, gənclərin vətənpərvərlik ruhunda tərbiyəsinə xüsusi önəm verəcək.
Rektorun sözlərinə görə, şəhidlərimizin xatirəsi xalqımızın birliyini və mübarizə əzmini daha da gücləndirir və onların müqəddəs ruhu qarşısında baş əyirik.
Allah Xocalı şəhidlərinə rəhmət eləsin.
