Naxçıvan Dövlət Universitetinin təşkilatçılığı ilə “Orqanik və dayanıqlı kənd təsərrüfatı: Ekoloji tarazlıq və dayanıqlı inkişaf” mövzusunda II Respublika Elmi Konfransı keçirilib. Mingəçevir Dövlət Universiteti (MDU) tədbirdə tərəfdaş qismində iştirak edib.
Konfransın plenar iclasında çıxış edən Mingəçevir Dövlət Universitetinin nümayəndəsi dayanıqlı kənd təsərrüfatı, iqlim dəyişmələri, ekoloji təhlükəsizlik və elmi innovasiyaların əhəmiyyətindən danışıb. Universitetdə yaşıl transformasiya, dayanıqlı enerji, su ehtiyatlarının idarə olunması və ekoloji monitorinq istiqamətlərində həyata keçirilən təşəbbüslər diqqətə çatdırılıb.
Dörd əsas elmi istiqamət üzrə 11 bölmə iclasını və 90-dan çox elmi məruzəni əhatə edən konfransda biomüxtəlifliyin qorunması, ekoloji tarazlığın təmin edilməsi, orqanik əkinçilik və innovativ aqrar texnologiyalarla bağlı aktual məsələlər müzakirə olunub.
Tədbir elmi əməkdaşlığın genişləndirilməsi, regional və respublika səviyyəsində birgə tədqiqatların təşviqi, yaşıl iqtisadiyyatın inkişafı və dayanıqlı gələcəyə yönəlmiş yeni tərəfdaşlıqların qurulması baxımından əhəmiyyət daşıyıb.
Mingəçevir Dövlət Universiteti elmi əməkdaşlıq əlaqələrinin genişləndirilməsini və dayanıqlı inkişaf istiqamətində birgə təşəbbüslərin həyata keçirilməsini əsas prioritetlərindən biri kimi müəyyənləşdirib.
Konfransın yüksək səviyyədə təşkilinə və səmərəli elmi müzakirələrə görə universitetin adından Naxçıvan Dövlət Universitetinin rektoru Elbrus İsayevə, Zəfər Qurbanova, Naxçıvan Muxtar Respublikasının iqtisadiyyat naziri Kazım Hüseynəliyevə, kənd təsərrüfatı naziri Rafail Quliyevə, AMEA-nın həqiqi üzvü, akademik Tariyel Talıbova, eləcə də təşkilat komitəsinə, tərəfdaş qurumların nümayəndələrinə və Naxçıvan Dövlət Universitetinin kollektivinə təşəkkür bildirilib.
Mingəçevir Dövlət Universiteti elmi əməkdaşlığın gücləndirilməsi, yaşıl iqtisadiyyatın təşviqi və dayanıqlı inkişaf naminə fəaliyyətini davam etdirir.
Esmira Hidayətova, Mingəçevir
