44 günlük Vətən müharibəsinin iştirakçısı, Mingəçevir Şəhər Mərkəzi Xəstəxanasının cərrahı Kərim Kərimov yay mövsümündə irinli yaralar, dolamalar və digər iltihabi xəstəliklərlə bağlı müraciətlərin artdığını açıqlayıb.
Yay mövsümündə havaların kəskin istiləşməsi ilə birlikdə irinli iltihabi xəstəliklərin sayında da artım müşahidə olunur. Mingəçevir Şəhər Mərkəzi Xəstəxanasının cərrah həkimi Kərim Laçın oğlu Kərimov bildirib ki, son günlər xəstəxanaya bədənin müxtəlif nahiyələrində yaranan dolamalar, irinli yaralar və digər irinli iltihabi proseslərlə bağlı müraciət edənlərin sayı xeyli artıb.
Qeyd edək ki, Kərim Kərimov 44 günlük Vətən müharibəsi zamanı könüllü olaraq cəbhəyə yollanıb və Füzuli istiqamətində gedən döyüşlərdə iştirak edərək Vətən qarşısındakı borcunu şərəflə yerinə yetirib. Bu gün isə o, Mingəçevir Şəhər Mərkəzi Xəstəxanasında yüzlərlə pasiyentin sağlamlığı naminə xidmət göstərir.
Həkimin sözlərinə görə, müraciət edənlər arasında təkcə Mingəçevir sakinləri deyil, ətraf rayon və şəhərlərin sakinləri də üstünlük təşkil edir. Yay aylarında yüksək temperatur, güclü tərləmə, gigiyena qaydalarına kifayət qədər əməl olunmaması və bakteriyaların sürətlə çoxalması irinli xəstəliklərin yaranması üçün əlverişli şərait yaradır.
“Klinikamıza daha çox bədənin müxtəlif nahiyələrində əmələ gələn dolamalar, irinli yaralar və digər irinli iltihabi xəstəliklərlə bağlı müraciətlər daxil olur. Bəzi hallarda xəstələrin vəziyyəti cərrahi müdaxilə tələb edir. Vaxtında həkimə müraciət etmək həm müalicəni asanlaşdırır, həm də ağırlaşmaların qarşısını alır”, – deyə Kərim Kərimov bildirib.
Mütəxəssis vətəndaşlara xəbərdarlıq edərək vurğulayıb ki, irinli yaraları ev şəraitində sıxmaq, deşmək və ya özbaşına müalicə etmək ciddi fəsadlara səbəb ola bilər. İlk əlamətlər müşahidə olunan kimi ixtisaslı həkimə müraciət olunması tövsiyə edilir.
Mingəçevir Şəhər Mərkəzi Xəstəxanasında bu cür müraciətlər operativ şəkildə qiymətləndirilir, xəstələr müayinə olunaraq vəziyyətlərinə uyğun konservativ və ya cərrahi müalicəyə cəlb edilirlər.
Dövrü mətbuatın əsas vəzifələrindən biri də cəmiyyətin sağlamlığı ilə bağlı maarifləndirici məlumatları ictimaiyyətə operativ şəkildə çatdırmaqdır. Həkimlərin bu kimi tövsiyələrinin işıqlandırılması insanların sağlamlıq risklərini vaxtında dəyərləndirməsinə, erkən diaqnostika və müalicəyə müraciət etməsinə mühüm töhfə verir.
Esmira Hidayətova, Mingəçevir
