Mingəçevir şəhərində yerləşən Mingəçevir Milli Qəhrəman Natiq Qasımov adına 4 saylı tam orta məktəbdə Xocalı faciəsinin 34-cü ildönümü ilə əlaqədar “Bu gün Xocalı azaddır, Xocalı abaddır və Xocalı qurbanlarının ruhları şaddır” adlı anım tədbiri keçirilib.
Tədbir əvvəlcə Azərbaycan Respublikasının Dövlət Himninin səsləndirilməsi ilə başlayıb. Ardınca Azərbaycanın müstəqilliyi və ərazi bütövlüyü uğrunda canlarından keçmiş şəhidlərin, eləcə də Xocalı qurbanlarının əziz xatirəsi bir dəqiqəlik sükutla yad edilib.
Məktəbin direktoru Zaur Müseyibov çıxış edərək Xocalı qətliamından 34 il keçdiyini xatırladıb. O bildirib ki, bu faciə təkcə Azərbaycan xalqına qarşı deyil, bütün bəşəriyyətə yönəlmiş ən ağır cinayətlərdən biridir:
“Bu dəhşətli hadisə hər bir azərbaycanlının yaddaşına əbədi həkk olunub. İllər keçsə də, Xocalı faciəsinin acısı və nəticələri heç vaxt unudulmayacaq.”
Direktor vurğulayıb ki, bu kimi tədbirlərin keçirilməsi və məktəblərdə aparılan məqsədyönlü vətənpərvərlik tərbiyəsi işi gənc nəslin milli ruhda formalaşmasına, onların daha yetkin və məsuliyyətli vətəndaş kimi yetişməsinə xidmət edir. O, həmçinin qeyd edib ki, məktəb Mingəçevir şəhərində ən çox şəhid vermiş təhsil ocaqlarından biridir – 13 məzunu şəhidlik zirvəsinə ucalıb. Məktəb adını daşıdığı Milli Qəhrəman Natiq Qasımovun qəhrəmanlıq yolunu daim örnək kimi təqdim edir.
Xocalı faciəsinə həsr olunmuş ədəbi-bədii kompozisiyada şagirdlər Vətənə və doğma torpağa bağlılıqlarını şeirlər, səhnəciklər və təsirli çıxışlar vasitəsilə nümayiş etdiriblər. Balaca fidanların duyğulu və təsirli ifaları iştirakçıların qəlbini riqqətə gətirib və alqışlarla qarşılanıb.
Qeyd edək ki, tədbirin təşkilatçısı 3 “C” sinif müəllimi Aytən Salahovadır. Onun rəhbərliyi ilə ərsəyə gələn proqram yüksək səviyyədə hazırlanıb və iştirakçılar tərəfindən böyük rəğbətlə qarşılanıb.
Tədbirdə şəhid ailələri, Mingəçevir Şəhər İcra Hakimiyyətinin nümayəndələri, eləcə də Mingəçevir Yazıçılar Birliyinin üzvü, gənc yazar və şairə Nərmin Əliyeva iştirak ediblər. Çıxış edənlər bildiriblər ki, Azərbaycan xalqı Xocalı faciəsini heç vaxt unutmayacaq və bu qanlı səhifə tariximizdə daim yaddaşlarda yaşayacaq.
Esmira Hidayətova Mingəçevir
