İsrail Dövlətinin Azərbaycan Respublikasındakı fövqəladə və səlahiyyətli səfiri Ronen Krausz Mingəçevir şəhərinə səfər edib.
Səfər çərçivəsində səfir Mingəçevir Şəhər İcra Hakimiyyətinin başçısı İlham İsmayılovla görüşüb. İcra başçısı qonağı salamlayaraq ona Azərbaycandakı diplomatik fəaliyyətində uğurlar arzulayıb və şəhər haqqında ətraflı məlumat verib.
İlham İsmayılov bildirib ki, Mingəçevir Azərbaycanın dördüncü sənaye şəhəri olmaqla yanaşı, həm də mühüm turizm mərkəzlərindən biridir. O, şəhərdə iri sənaye müəssisələrinin, dördulduzlu hotellərin, bir universitetin, iki kollecin və müxtəlif mədəniyyət ocaqlarının fəaliyyət göstərdiyini diqqətə çatdırıb. Qeyd olunub ki, Mingəçevir yalnız sənaye və turizm potensialı ilə deyil, həm də elmi, təhsil və mədəni imkanları ilə seçilir.
Görüş zamanı 44 günlük Vətən müharibəsi dövründə İsrailin Azərbaycana göstərdiyi mənəvi dəstəyə görə təşəkkürünü ifadə edən İlham İsmayılov iki ölkə arasında əməkdaşlığın daha da genişləndirilməsinin əhəmiyyətini vurğulayıb. O, israilli iş adamlarını Mingəçevirdə sənaye, turizm və tibb sahələrinə investisiya yatırmağa dəvət edərək, şəhərdə yeni layihələrin həyata keçirilməsi üçün əlverişli şəraitin mövcud olduğunu bildirib.
Səfir Ronen Krausz göstərilən qonaqpərvərliyə görə minnətdarlığını ifadə edib. O, səfərinin əsas məqsədinin Mingəçeviri yaxından tanımaq olduğunu bildirərək şəhərdə olmaqdan məmnunluğunu qeyd edib.
Səfir vurğulayıb ki, Azərbaycan və İsrail arasında uzun illərə söykənən dostluq və tərəfdaşlıq münasibətləri mövcuddur. Onun sözlərinə görə, iki ölkə arasında əməkdaşlıq əsasən energetika və müdafiə sahələrini əhatə etsə də, hazırda digər istiqamətlər üzrə də əlaqələrin genişləndirilməsi istiqamətində işlər aparılır.
Ronen Krausz Azərbaycanın müxtəlif bölgələrinə, o cümlədən Qarabağ və Laçına səfər etdiyini, bu səfərlərdən xoş təəssüratlarla ayrıldığını da diqqətə çatdırıb.
Görüşün sonunda tərəflər arasında xatirə hədiyyələri təqdim olunub.
Ronen Krausz Cənubi Qafqazın ən böyük istilik elektrik stansiyası olan “Azərbaycan” İstilik Elektrik Stansiyasını və “Azərbaycan İES” MMC-ni də ziyarət edib.
Səfər çərçivəsində İsrailin Azərbaycandakı fövqəladə və səlahiyyətli səfiri Ronen Krausz və Mingəçevir şəhər icra hakimiyyətinin nümayəndəsi şəhərin aparıcı sənaye müəssisələrindən olan “Mingəçevir Tekstil” MMC-də də olublar. Qonaqlara müəssisənin istehsal prosesi, müasir avadanlıqlarla təchiz edilmiş istehsal sahələri və ixrac potensialı barədə ətraflı məlumat verilib. Səfər zamanı tekstil sənayesinin inkişaf perspektivləri, investisiya imkanları və gələcək əməkdaşlıq istiqamətləri ətrafında fikir mübadiləsi aparılıb.
Esmira Hidayətova, Mingəçevir
