Azərbaycan Ordusunun şanlı qələbəsi ilə tarixə düşən Aprel döyüşlərinin başlanmasından 10 il ötür. Bu döyüşlər xalqımızın mübarizə əzmini, ordumuzun gücünü bir daha nümayiş etdirməklə yanaşı, gələcək böyük zəfərin əsasını qoyan mühüm mərhələlərdən biri kimi yadda qalıb. Qəhrəmanlıq salnaməsi yazan igidlərimizin xatirəsi bu gün də dərin ehtiramla yad edilir, onların göstərdiyi şücaət heç zaman unudulmur.
Mingəçevir şəhəri də Aprel döyüşlərində öz igid övladlarını Vətən uğrunda fəda edib. Rahim Tağıyev, Rüstəm Əhmədov, Adil Adilzadə və Teymur Qasımov döyüş meydanında göstərdikləri igidliklə şəhidlik zirvəsinə ucalaraq adlarını tarixə qızıl hərflərlə yazdırıblar. Bu qəhrəmanların əziz xatirəsi şəhər ictimaiyyəti tərəfindən daim hörmət və ehtiramla anılır.
Mingəçevir Şəhər İcra Hakimiyyətinin başçısı İlham İsmayılov, şəhər prokuroru, polis və digər hüquq-mühafizə orqanlarının rəhbərləri Aprel şəhidlərindən olan Teymur Qasımovun ailəsini ziyarət ediblər. Görüş zamanı şəhid ailəsinin qayğı və problemləri ilə yaxından maraqlanılıb, onların sosial rifahının daha da yaxşılaşdırılması istiqamətində görülən işlər diqqətə çatdırılıb. Qeyd olunub ki, şəhid ailələri və qazilər dövlət siyasətinin əsas prioritet istiqamətlərindən biridir.
İcra başçısı İlham İsmayılov bildirib ki, şəhid ailələrinə və qazilərə göstərilən diqqət və qayğı davamlı xarakter daşıyır. Onun sözlərinə görə, Azərbaycan dövləti bu kateqoriyadan olan vətəndaşların sosial müdafiəsinin gücləndirilməsi üçün ardıcıl və sistemli tədbirlər həyata keçirir. Vurğulanıb ki, Mingəçevirdə də şəhid ailələri daim diqqət mərkəzində saxlanılır, onların problemlərinin operativ həlli üçün müvafiq qurumlar tərəfindən mütəmadi addımlar atılır.
Şəhid ailələri göstərilən diqqət və qayğıya görə minnətdarlıqlarını bildirərək, dövlət tərəfindən onlara göstərilən dəstəyin hər zaman hiss olunduğunu qeyd ediblər. Belə görüşlərin onların mənəvi dayanıqlığını artırdığı, şəhidlərin xatirəsinin yaşadılması baxımından mühüm əhəmiyyət kəsb etdiyi vurğulanıb.
Qeyd edək ki, Mingəçevirdə Aprel şəhidlərinin ailələrinin sosial təminatı istiqamətində mühüm işlər görülüb. Belə ki, dörd şəhid ailəsindən ikisi Gəncə şəhərində yeni mənzillərlə təmin olunub, digər iki ailə üçün isə Mingəçevir şəhərində yararsız vəziyyətdə olan evlər sökülərək onların yerində müasir, geniş, 3 otaqlı yeni mənzillər tikilərək istifadəyə verilib.
Esmira Hidayətova, Mingəçevir
