Görüşün əsas məqsədi tələbələrin universitet mühitinə adaptasiyasına dəstək göstərmək, onları MDU-nun təhsil imkanları, akademik mühiti, tələbəyönümlü yanaşması və inkişaf prioritetləri barədə məlumatlandırmaq, eləcə də yeni tədris ili münasibətilə təbrik etmək olub.
Tələbələri salamlayan rektor Anar Eminov onları MDU-ya qəbul olunmaları və universitet həyatında yeni mərhələyə qədəm qoymaqları münasibətilə təbrik edib. Rektor qeyd edib ki, tələbəlik illəri yalnız ixtisas üzrə bilik və bacarıqların əldə edilməsi deyil, eyni zamanda dünyagörüşünün formalaşdığı, sosial məsuliyyət, təşəbbüskarlıq, liderlik və komanda ilə işləmək bacarıqlarının inkişaf etdiyi mühüm bir dövrdür.
Görüş zamanı 2026/2027-ci tədris ili üzrə qəbul göstəriciləri barədə də məlumat verilib. Bildirilib ki, bu il MDU-da bakalavriat səviyyəsində 38 ixtisas üzrə 1631 nəfər tələbə, magistratura səviyyəsində isə 29 ixtisaslaşma üzrə 130 nəfər magistrant adını qazanıb. Rektor yeni qəbul göstəricilərinin universitetə göstərilən etimadın və MDU-da həyata keçirilən inkişaf proseslərinin mühüm göstəricilərindən biri olduğunu diqqətə çatdırıb.
Anar Eminov tələbələrə MDU-da yaradılmış təhsil və inkişaf imkanlarından səmərəli istifadə etməyi, tədris prosesində fəal olmağı, elmi-tədqiqat, innovasiya, beynəlxalq mübadilə, könüllülük, sosial və ictimai fəaliyyətlərdə yaxından iştirak etməyi tövsiyə edib. Bildirilib ki, universitetdə müasir əmək bazarının tələblərinə uyğun yüksəkixtisaslı mütəxəssislərin hazırlanması ilə yanaşı tələbələrin fərdi və peşəkar inkişafına, praktik bacarıqlarının gücləndirilməsinə və beynəlxalq təcrübə imkanlarının genişləndirilməsinə xüsusi önəm verilir.
Rektor çıxışında MDU-da müasir, əlçatan və tələbəyönümlü təhsil mühitinin inkişaf etdirilməsinin əsas prioritetlərdən biri olduğunu diqqətə çatdırıb. Gənclərin təhsil aldığı dövrdə yalnız peşəkar mütəxəssis kimi deyil, eyni zamanda cəmiyyət qarşısında məsuliyyətini dərk edən, təşəbbüskar və müasir çağırışlara həssas vətəndaş kimi formalaşmasını universitetin təhsil yanaşmasında mühüm yer tutduğu vurğulanıb.
Görüşdə tələbələrin ətraf mühitə məsuliyyətli münasibətinin formalaşdırılması, ekoloji düşüncə mədəniyyətinin təşviqi, mövcud resurslardan səmərəli istifadə və universitet həyatında dayanıqlı yanaşmaların genişləndirilməsinin əhəmiyyəti də diqqətə çatdırılıb. Tələbələrin bu istiqamətdə həyata keçirilən təşəbbüslərdə fəal iştirakı həm universitet mühitinin inkişafına, həm də cəmiyyət üçün məsuliyyətli gənc nəslin yetişməsinə mühüm töhfə olduğu bildirilib.
Yeni qəbul olunmuş tələbələrə müraciət edən Anar Eminov onların universitetin akademik və ictimai həyatında fəal iştirak edəcəklərinə, yeni ideya və təşəbbüsləri ilə MDU-nun inkişafına töhfə verəcəklərinə əminliyini ifadə edib.
Rektor tələbələrə müraciətində bildirib: “Siz artıq Mingəçevir Dövlət Universitetinin böyük ailəsinin bir üzvüsünüz. Qarşıdakı illər ərzində əldə edəcəyiniz bilik və bacarığın gələcək peşəkar fəaliyyətiniz üçün möhkəm təməl olacağına inanıram. Sizə daim öyrənməyi, araşdırmağı, yeni imkanlardan çəkinmədən istifadə etməyi və qarşınıza yüksək hədəflər qoymağı arzulayıram. Hər birinizin uğuru həm universitetimizin, həm də cəmiyyətimizin gələcəyinə verilən dəyərli töhfədir. Yeni tədris ilinin hər biriniz üçün uğurlu, məhsuldar və yaddaqalan olmasını arzulayıram”.
Sonda rektor Anar Eminov tələbələri 2026/2027-ci tədris ilinin başlanması və MDU tələbəsi adını qazanmaları münasibətilə bir daha təbrik edib, onlara yüksək akademik nailiyyətlər, zəngin tələbəlik həyatı, şəxsi və peşəkar inkişaf yolunda uğurlar arzulayıb.
Görüş qarşılıqlı fikir mübadiləsi şəraitində davam edib, tələbələri maraqlandıran suallar cavablandırılıb, qarşılıqlı müzakirələr aparılıb.
