Müəllif: Esmira Hidayətova
Azərbaycanda hər il 22 iyul Milli Mətbuat Günü kimi qeyd olunur. Bu tarix Azərbaycan mətbuatının ən qədim nümunəsi olan “Əkinçi” qəzetinin nəşrə başlaması (1875-ci il) ilə bağlıdır. Milli Mətbuat Günü ərəfəsində silsilə müsahibələrimizə Mingəçevir Şəhər İcra Hakimiyyətinin Başçısının müavini – Ərazi-təşkilat və ictimai-siyasi məsələlər şöbəsinin müdiri Hikmət Kərimovla həmsöhbət olduq.
Esmira Hidayətova: Hörmətli Hikmət müəllim, Milli Mətbuat Günü ərəfəsində öncə ümumi olaraq Azərbaycan mətbuatının bu günkü vəziyyətini və mətbuat azadlığını necə qiymətləndirirsiniz?
Hikmət Kərimov:
Milli Mətbuat Günümüzü təbrik edirəm. Azərbaycan mətbuatı bu gün yüksək inkişaf mərhələsindədir. Ölkəmizdə söz və mətbuat azadlığı Konstitusiya ilə təmin olunub və bu hüququn həyata keçirilməsi üçün geniş imkanlar yaradılıb. “Əkinçi”dən başlayan ənənə bu gün müasir texnologiyalarla zənginləşərək davam edir. Medianın cəmiyyətin inkişafındakı rolu danılmazdır.
Esmira Hidayətova: İcra hakimiyyəti ilə bölgə media qurumları arasında informasiya mübadiləsi hansı səviyyədə təşkil olunub?
Hikmət Kərimov:
İnformasiya mübadiləsi çox yüksək səviyyədədir. Rəsmi məlumatlar operativ şəkildə media nümayəndələrinə çatdırılır. Press-relizlər, açıqlamalar, foto və video materiallar daim paylaşılır. Media ilə əlaqələr daimidir, onların suallarına və sorğularına operativ cavab verilir. Bu, şəffaflığın və ictimai etimadın artırılması baxımından vacibdir.
Esmira Hidayətova: Rəsmi məlumatların operativ yayılmasında onlayn medianın imkanlarını necə qiymətləndirirsiniz?
Hikmət Kərimov:
Onlayn medianın imkanlarını çox yüksək qiymətləndiririk. Bu gün informasiya real vaxt rejimində milyonlarla insana çata bilir. Biz də bu fürsətdən istifadə edərək şəhərdə aparılan abadlıq işləri, sosial layihələr və vacib tədbirlər barədə vətəndaşları operativ məlumatlandırırıq. Onlayn media eyni zamanda əks əlaqəni gücləndirir.
Esmira Hidayətova: Bölgə jurnalistlərinin fəaliyyəti ictimaiyyətlə dövlət qurumları arasında körpü rolunu oynayırmı?
Hikmət Kərimov:
Əlbəttə, oynayır. Bölgə jurnalistləri vətəndaşların problemlərini, təkliflərini bizə çatdırır, dövlətin gördüyü işləri isə əhaliyə obyektiv şəkildə təqdim edirlər. Bu körpü sayəsində bir çox məsələlər tez həllini tapır. Biz jurnalistlərin fəaliyyətini yüksək qiymətləndirir və onları hər cür dəstəkləyirik.
Esmira Hidayətova: Milli mədəniyyətin inkişafında mətbuatın rolunu necə görürsünüz?
Hikmət Kərimov:
Mətbuat milli mədəniyyətin inkişafında əvəzolunmaz rol oynayır. O, xalqımızın mənəvi dəyərlərini, dilimizi, ədəbiyyatımızı və tariximizi geniş auditoriyaya çatdırır. Mingəçevirdə də mətbuat vasitəsilə mədəni tədbirlər, ədəbi görüşlər və milli bayramlarımız geniş işıqlandırılır. Bu, gənc nəslin vətənpərvərlik ruhunda tərbiyəsində böyük əhəmiyyət kəsb edir.
Esmira Hidayətova: Bu gün bölgə mətbuatının inkişaf səviyyəsini necə qiymətləndirərsiniz?
Hikmət Kərimov:
Bölgə mətbuatı son illər əhəmiyyətli dərəcədə inkişaf edib. Texniki baza yaxşılaşır, peşəkar kadrlar yetişir. Mingəçevir mediası şəhərin həyatını dolğun əks etdirir. Əlbəttə, inkişaf davamlı prosesdir və biz bu istiqamətdə media ilə əməkdaşlığı daha da genişləndirməyə hazırıq.
Esmira Hidayətova: Gələcəkdə region mediası ilə əməkdaşlığın genişləndirilməsi istiqamətində hansı addımlar nəzərdə tutulur?
Hikmət Kərimov:
Gələcək planlarımızda birgə layihələr, press-turlar, seminar və treninq-lər, həmçinin rəsmi məlumatların müasir formatlarda (infografika, video) hazırlanması var. Media ilə birgə sosial və mədəni layihələr həyata keçirmək niyyətindəyik. Məqsədimiz Mingəçevirin inkişafına media dəstəyini artırmaq və əməkdaşlığı yeni səviyyəyə qaldırmaqdır.
Esmira Hidayətova: Müsahibəyə görə təşəkkür edirik, Hikmət müəllim.
Silsilə müsahibələrimiz digər dövlət qurumları ilə davam edəcək.
