Mingəçevirdə Azərbaycanın Milli Qəhrəmanı Dilqəm Nağıyevin mövludu münasibətilə onun adını daşıyan Dilqəm Nağıyev küçəsində ucaldılan abidənin açılış mərasimi keçirilib.
Tədbirdə Mingəçevir Şəhər İcra Hakimiyyətinin nümayəndəsi Sahib Əliyev, Səfərbərlik və Hərbi Xidmətə Çağırış üzrə Dövlət Xidmətinin Mingəçevir şəhər şöbəsinin əməkdaşları, YAP şəhər təşkilatının nümayəndələri, qəhrəmanın təhsil aldığı və adını daşıyan 9 nömrəli tam orta məktəbin direktoru Seymur Məhərrəmov, Mingəçevir Heydər Əliyev Mərkəzinin direktoru Mənsur Həsənov, qazilər, yerli sakinlər və şəhidin ailə üzvləri iştirak ediblər.
Bildirilib ki, Milli Qəhrəman Dilqəm Nağıyevin mövludu hər il ənənəvi olaraq iyunun 24-də yerli təşkilatların iştirakı ilə qeyd olunur.
Əvvəlcə Azərbaycanın ərazi bütövlüyü uğrunda canlarından keçən şəhidlərin xatirəsi bir dəqiqəlik sükutla yad edilib. Daha sonra abidənin önünə gül dəstələri düzülərək qəhrəmanın əziz xatirəsinə ehtiram nümayiş etdirilib.
Tədbirdə çıxış edən Mingəçevir Şəhər İcra Hakimiyyətinin nümayəndəsi Sahib Əliyev icra başçısı İlham İsmayılovun salamlarını iştirakçılara çatdırıb. O, qəhrəmanın adını daşıyan ərazidə abadlıq işlərinin aparılacağını və bir sıra layihələrin həyata keçiriləcəyini bildirib.
Qeyd edək ki, Dilqəm Heydər oğlu Nağıyev 24 iyun 1975-ci ildə Mingəçevirdə anadan olub. O, Birinci Qarabağ müharibəsində göstərdiyi igidliklə yanaşı, 1995-ci ilin mart hadisələri zamanı dövlətçiliyin müdafiəsində də fəal iştirak edib.
Milli Qəhrəmanın döyüş yolu Əhmədbəyli, Mahmudlu, Bala Bəhmənli, Böyük Bəhmənli və Kürdmahmudlu kəndlərinin müdafiəsindən keçib. Döyüşlərdə göstərdiyi şücaətə görə komandirləri tərəfindən yüksək qiymətləndirilib və qısa müddətdə çavuş rütbəsinə layiq görülüb.
1994-cü ilin oktyabrında Gəncədə dövlət çevrilişinə cəhd zamanı mühüm obyektlərin geri qaytarılmasında iştirak edən Dilqəm Nağıyev, 15 mart 1995-ci ildə Tovuz-Ağstafa istiqamətində qiyamçıların zərərsizləşdirilməsi əməliyyatı zamanı qəhrəmancasına həlak olub.
Azərbaycan Respublikası Prezidentinin 4 aprel 1995-ci il tarixli fərmanı ilə Dilqəm Nağıyevə ölümündən sonra “Azərbaycanın Milli Qəhrəmanı” adı verilib. O, Mingəçevir Şəhidlər xiyabanında dəfn olunub. Qəhrəmanın adını Mingəçevirdəki 9 nömrəli tam orta məktəb daşıyır və təhsil ocağının həyətində onun büstü ucaldılıb.
Esmira Hidayətova, Mingəçevir
