Birləşmiş Millətlər Təşkilatının Qaçqınlar üzrə Ali Komissarlığı (UNHCR) 2025-ci ildə rekord sayda Rohinca qaçqın (Rohinca qaçqınları, Myanmadakı hərbi təzyiq və “etnik təmizləmə” səbəbindən 700 mindən çoxu Banqladeşə, eləcə də Hindistan və İndoneziyaya sığınan müsəlman azlığıdır – red.) ölümünü qeydə alıb. Risklərə baxmayaraq, minlərlə insan dənizə üz tutmağa davam edir.
2025-ci ildə təxminən 900 Rohinca qaçqını Andaman dənizi və Benqal körfəzini keçməyə çalışarkən həlak olub və ya itkin düşüb. Birləşmiş Millətlər Təşkilatının Qaçqınlar üzrə Ali Komissarlığının (UNHCR) məlumatına görə, bu, bu marşrutda indiyə qədər qeydə alınan ən yüksək ölüm sayıdır.
Ötən il dəniz yolu ilə regiondan qaçmağa cəhd edən təxminən 6500 nəfərdən – yeddi nəfərdən birindən çoxu bu səyahətdən sağ çıxa bilməyib və ya itkin düşüb. BMT QAK-ın nümayəndəsi Babar Baloh qeyd edib ki, bu, dünyada bütün qaçqınlar və miqrantlar arasında ən yüksək ölüm nisbətidir.
Təhlükəli səyahət 2026-cı ildə də davam edir. aprelın 13-nə olan məlumata görə, artıq 2800-dən çox Rohinca qaçqını dəniz səyahətinə çıxıb. BMT vurğulayır ki, son illərdə bu yolu keçməyə çalışanların yarıdan çoxu qadın və uşaqlardır.
BMT qeyd edir ki, Myanmada davam edən humanitar böhran və Banqladeşdəki qaçqın düşərgələrindəki ağır şərait səbəbindən insanlar həyatlarını təhlükəyə atmağa məcburdurlar. Əksəriyyəti Malayziya, İndoneziya və ya Tailandda təhlükəsizlik və daha yaxşı yaşayış şəraiti axtarır.
Bu həftə daha bir faciə qeydə alınıb: Rohinca qaçqınlarını və Teknafdan olan Banqladeş vətəndaşlarını daşıyan qayığın Andaman dənizində çevrilməsi nəticəsində təxminən 250 nəfər itkin düşüb.
BMT QAK humanitar proqramların maliyyələşdirilməsinin azaldılmasının vəziyyəti daha da pisləşdirdiyini qeyd edir. Babar Balohun sözlərinə görə, sağ qalma şanslarının aşağı olmasına baxmayaraq, insanları təhlükəli səyahətlərə çıxmağa vadar edən çarəsizlikdir.
2026-cı ildə agentlik Koks-Bazar düşərgələrində və Bhasan Çar adasında Rohinca qaçqınlarına dəstək olmaq üçün donorlara 200 milyon dollar yardım etmək üçün müraciət edib. İndiyə qədər tələb olunan məbləğin yalnız 32 faizi maliyyələşdirilib.
Ümumilikdə, bölgədə 1,3 milyondan çox Rohinca qaçqını hələ də məcburi köçkündür, onlardan təxminən 1,2 milyonu Banqladeşdədir.
