Ədliyyə Nazirliyində sürücü vəzifəsi üzrə işə düzəlmək istəyən şəxs dələduzluqla üzləşib. 

Aqşin Hüseynovu (şərti) Namiq adlı şəxs aldadıb. O, zərərçəkmişdən 12 000 manat alaraq iş məsələsini həll edəcəyini bildirib. Lakin verdiyi vədi yerinə yetirməyib.

Hüquq-mühafizə orqanlarına müraciətdən sonra həmin şəxs saxlanılıb. Araşdırmalar zamanı Namiqin daha 3 nəfərə qarşı dələduzluq etdiyi müəyyən olunub. O, bir nəfərin banka olan 3200 dollar borcunu 2500 manat müqabilində sildirəcəyinə dair vəd verib. Lakin vədini yerinə yetirməyib.

Digər zərərçəkmişlərə gəlincə, onlardan biri işə düzəlmək üçün Namiqə 15000 manat verib. Sonradan aldadıldığını başa düşüb. Başqa bir zərərçəkmiş isə xidmət etdiyi hərbi hissəni başqası ilə dəyişmək istəyib. Namiq bu məsələni 15 000 manat müqabilində əhll edəcəyini deyib.

Binəqədi Rayon Məhkəməsində Cinayət Məcəlləsinin 178.2.1, 178.2.2 və 178.2.4-cü maddələri ilə mühakimə olunan Namiq verilmiş ittiham üzrə özünü qismən təqsirli bilib.

Məhkəmənin hökmü ilə ona 2 il 4 ay müddətinə azadlıqdan məhrumetmə cəzası təyin edilib. Onun həbsdə saxlanılıdğı 3 ay 2 gün müddət təyin edilmiş cəzadan çıxılıb və üzərində 2 il 28 gün müddətinə azadlıqdan məhrumetmə cəzası saxlanılıb.