“Müasir beynəlxalq münasibətlər sistemi ciddi sınaqlarla üz-üzədir. Regional münaqişələrin artması, enerji və təhlükəsizlik böhranları, böyük güclər arasında rəqabətin dərinləşməsi dünyada sabitliyi getdikcə daha kövrək hala gətirir. Belə bir şəraitdə qlobal dialoq və əməkdaşlıq platformalarının rolu daha da artır. Bu baxımdan Qlobal Baku Forum beynəlxalq səviyyədə mühüm siyasi və intellektual müzakirə məkanına çevrilərək qlobal problemlərin həlli üçün fikir mübadiləsinin aparıldığı nüfuzlu platforma kimi çıxış edir”.
Bunu Milli Məclisin deputatı Kamran Bayramov deyib.
Bakı – qlobal dialoq mərkəzi
Onun szölərinə görə, Qlobal Bakı Forumunun əhəmiyyətini artıran əsas amillərdən biri də onun iştirakçılarının yüksək səviyyədə olmasıdır. “Forumda dünyanın müxtəlif ölkələrindən prezidentlər, baş nazirlər, parlament sədrləri, tanınmış siyasətçilər, diplomatlar, akademiklər və vətəndaş cəmiyyəti nümayəndələri iştirak edir. Bu baxımdan forum bir çox nüfuzlu beynəlxalq tədbirlərlə eyni səviyyədə qiymətləndirilir.
Burada müxtəlif sahələr üzrə təcrübəyə malik insanlar bir araya gələrək qlobal təhlükəsizlik, iqtisadi inkişaf, enerji siyasəti, humanitar problemlər və sivilizasiyalararası dialoq kimi məsələlər ətrafında fikir mübadiləsi aparırlar. Məqsəd xalqların həyatını daha təhlükəsiz və daha sabit etmək üçün yeni ideyalar və yanaşmalar irəli sürməkdir”, – o vurğulayıb.
Humanitar və sivilizasiyalararası dialoq
Deputat əlavə edib ki, müasir dövrdə dünyada yaranan bir çox böhranların kökündə qarşılıqlı anlaşmazlıq, siyasi qarşıdurma və mədəni fərqliliklərin düzgün idarə olunmaması dayanır: “Bu səbəbdən humanitar diplomatiya və sivilizasiyalararası dialoq qlobal problemlərin həllində mühüm vasitələrdən biri kimi çıxış edir.
Azərbaycanın həyata keçirdiyi siyasət də məhz bu istiqamətə yönəlib. Prezident İlham Əliyev və Birinci vitse-prezident Mehriban Əliyevanın təşəbbüsləri ilə Bakı müxtəlif beynəlxalq tədbirlərə, forumlara və dialoq platformalarına ev sahibliyi edir. Bu siyasət Azərbaycanın yalnız regional deyil, qlobal səviyyədə də dialoq və əməkdaşlıq mərkəzinə çevrilməsinə səbəb olub.
Bakı bu gün müxtəlif mədəniyyətlərin və sivilizasiyaların qovuşduğu məkan kimi qəbul edilir. Bu isə Azərbaycanın yumşaq güc siyasətinin mühüm elementlərindən biridir. Mədəniyyətlərarası dialoq, humanitar əməkdaşlıq və beynəlxalq forumların təşkili Azərbaycanın qlobal imicini gücləndirən əsas amillərdən sayılır.
Azərbaycanın sülh və təhlükəsizlik təcrübəsi
Qlobal Bakı Forumunda müzakirə edilən əsas mövzulardan biri də təhlükəsizlik və sülh məsələləridir. Müasir dünyada təhlükəsizlik olmadan inkişafdan danışmaq mümkün deyil. Bu baxımdan Azərbaycanın keçdiyi tarixi yol və əldə etdiyi təcrübə beynəlxalq ictimaiyyət üçün maraq doğurur.
Azərbaycan uzun illər ərzində işğal və münaqişə şəraitində yaşamış ölkədir. Təxminən 30 il ərzində ölkə ərazisinin mühüm hissəsi işğal altında olub. Bu müddət ərzində beynəlxalq təşkilatların qəbul etdiyi qərarlar kağız üzərində qalsa da, Azərbaycan suverenliyini bərpa etmək istiqamətində siyasi iradə nümayiş etdirib.
Azərbaycan öz ərazi bütövlüyünü təmin etdikdən sonrakı mərhələdə isə regionda sülhün təmin olunması istiqamətində siyasi addımlar atılıb. Azərbaycan və Ermənistan arasında münasibətlərin normallaşması və sülh prosesində əldə olunan irəliləyiş regionda yeni siyasi reallıq yaradıb.
Bu təcrübə Azərbaycanın beynəlxalq platformalarda paylaşa biləcəyi mühüm nümunələrdən biridir. Münaqişənin həlli, suverenliyin bərpası və sonrakı mərhələdə sülhün təmin edilməsi məsələsi qlobal münaqişələrin həlli baxımından diqqət çəkən model kimi qiymətləndirilir”.
Enerji və nəqliyyat təhlükəsizliyi
Deputat onu da qeyd edib ki, Qlobal Bakı Forumunda müzakirə olunan digər mühüm mövzulardan biri enerji və nəqliyyat təhlükəsizliyidir: “Müasir dünyada enerji təhlükəsizliyi milli təhlükəsizliyin ayrılmaz hissəsinə çevrilib.
Azərbaycan bu sahədə də mühüm rol oynayır. Ölkə neft, qaz, elektrik enerjisi və enerji məhsullarının istehsalı və ixracı ilə qlobal enerji bazarında etibarlı tərəfdaş kimi tanınır. Son illərdə Azərbaycanın qaz ixrac etdiyi ölkələrin sayı əhəmiyyətli dərəcədə artıb və bu proses davam edir.
Eyni zamanda Azərbaycan beynəlxalq nəqliyyat-logistika layihələrinin mühüm iştirakçısıdır. Şərq–Qərb və Şimal–Cənub nəqliyyat dəhlizləri üzrə həyata keçirilən layihələr Azərbaycanın regionda tranzit və logistika mərkəzi rolunu daha da gücləndirir.
Bakı – yumşaq güc mərkəzi
Bütün bu amillər Bakının təkcə regional siyasi mərkəz deyil, həm də qlobal dialoq və əməkdaşlıq platforması kimi mövqeyini möhkəmləndirir. Qlobal Bakı Forumu kimi tədbirlər Azərbaycanın yumşaq güc siyasətinin mühüm alətlərindən biridir.
Bu forum vasitəsilə Azərbaycan dünyada mövcud olan problemlərin müzakirəsinə töhfə verir, müxtəlif ölkələr arasında dialoqu təşviq edir və qlobal əməkdaşlıq mühitinin formalaşmasına xidmət edir. Nəticə etibarilə Bakı artıq beynəlxalq ictimaiyyət tərəfindən qlobal böhranların həlli üçün fikir və təşəbbüslərin formalaşdığı mühüm mərkəzlərdən biri kimi qəbul olunur.
Beləliklə, Qlobal Bakı Forumu yalnız bir beynəlxalq tədbir deyil, həm də dəyişən dünyada sülh, təhlükəsizlik və əməkdaşlıq ideyalarının formalaşdığı strateji platforma kimi çıxış edir. Azərbaycanın həyata keçirdiyi uzaqgörən siyasət sayəsində Bakı bu gün qlobal dialoq və əməkdaşlığın mühüm ünvanlarından birinə çevrilib”.
