18 fevral tarixində Mingəçevir Şəhər İcra Hakimiyyəti-ndə Şuranın növbəti iclası keçirilib. İclasa şura üzvləri, şəhər üzrə idarə və müəssisə rəhbərləri, eləcə də KİV nümayəndələri qatılıblar.
Şəhər icra başçısı İlham İsmayılov gündəlikdə iki əsas məsələnin olduğunu bildirib:
Mingəçevir şəhəri üzrə dövlət büdcəsinin 2026-cı il üçün təsdiq olunmuş gəlir və xərcləri haqqında hesabat
Bərk məişət tullantılarının yığılması, daşınması və zərərsizləşdirilməsi üzrə xidmət haqqının ödənişi vəziyyəti və yığılan vəsaitin xərclənməsi barədə YSTİ rəhbərinin hesabatı
50 minə yaxın istifadəçi müqavilədən yayınır
Müzakirələr zamanı icra başçısı xüsusilə tullantıların daşınması sahəsində mövcud problemlərə diqqət çəkib. Onun sözlərinə görə, Mingəçevirdə 50 mindən çox sakin məişət tullantılarının daşınmasına görə üzərinə düşən müqavilə öhdəliyini yerinə yetirmir.
Bu açıqlama fonunda Yaşıllaşdırma və Sanitar Təmizlik İdarəsinin müdiri Tahir Abdullayev-ə irad bildirilib və sahədə mövcud nöqsanların aradan qaldırılmasının vacibliyi vurğulanıb.
İcra başçısı qeyd edib ki, məişət tullantıları üzrə xidmət haqları adam sayına uyğun müqavilə əsasında müəyyən edilir. Lakin şəhərdə on minlərlə istifadəçi ya müqavilə bağlamır, ya da ödənişdən yayınır.
“Ödənişlər toplansa, yeni texnikalar ala bilərik”
İlham İsmayılov bildirib ki, əgər bu vəsaitlər vaxtında və tam şəkildə yığılsa, şəhər təsərrüfatının gücləndirilməsi, tullantıların müasir qaydada daşınması üçün yeni və müasir yük maşınlarının alınması mümkün olar.
Onun sözlərinə görə, ödəniş intizamının təmin edilməsi həm xidmət keyfiyyətini artırar, həm də şəhərin kommunal infrastrukturunun yenilənməsinə imkan verər.
“Çalışaq müqavilədən yayınmaların qarşısını alaq. Müqavilə haqları ödənsə, Mingəçevirin müasir xidmət texnikası ilə təmin olunması davam edəcək”, – deyə icra başçısı vurğulayıb.
Sonda o, yerli mətbuat nümayəndələrini əhali arasında maarifləndirmə işinə dəstək verməyə çağırıb.
Şura iclasında gündəlikdə olan məsələlər ətraflı müzakirə edildikdən sonra hər bir istiqamət üzrə müvafiq qərarlar qəbul olunub. Qəbul edilən qərarların icrasına nəzarətin gücləndiriləcəyi bildirilib.
Esmira Hidayətova, Mingəçevir
