İrandan atılan və Türkiyə hava məkanına daxil olan ballistik raket Şərqi Aralıq dənizində yerləşdirilən NATO hava və raketdən müdafiə elementləri tərəfindən zərərsizləşdirilib.

Bu barədə Türkiyə Milli Müdafiə Nazirliyi məlumat yayıb.
Verilən məlumat görə, raketin bəzi hissələri Qaziantepdəki boş sahələrə düşüb. Hadisə nəticəsində ölən və yaralanan olmayıb.

Rəsmi Ankara bununla bağlı Tehrana ciddi xəbərdarlıq edib.
“Türkiyə mehriban qonşuluq münasibətlərinə və regional sabitliyə böyük əhəmiyyət verir. Bununla belə, bir daha vurğulayırıq ki, ölkəmizin ərazisinə və hava məkanına yönəlmiş hər hansı bir təhdidə qarşı bütün lazımi addımlar qətiyyətlə və tərəddüd etmədən atılacaq. Hər kəsə xatırladırıq ki, Türkiyənin bu mövzuda xəbərdarlıqlarına qulaq asmaq hər kəsin xeyrinədir”, -Müdafiə Nazirliyinin məlumatında deyilir.

Türkiyə Prezident Administrasiyasının Kommunikasiya Direktoru Burhanəddin Duran  isə bildirib ki, Türkiyənin hava məkanını və sərhəd təhlükəsizliyini qorumaq iradəsi və qabiliyyəti ən yüksək səviyyədədir. “Bölgədəki gərginliyin daha da artmasının və münaqişələrin daha geniş əraziyə yayılmasının qarşısını almaq son dərəcə vacibdir. Bütün tərəflərə, xüsusən də İrana regional təhlükəsizliyi təhlükə altına qoyan və mülki şəxsləri təhlükəyə atan hərəkətlərdən çəkinmək barədə xəbərdarlıq edirik”, – Duran qeyd edib.
Mürtəza