Xalq inanclarına görə, dəhlizin düzgün təşkil edilməməsi və burada uyğun olmayan əşyaların toplanması uğur, bolluq və xoşbəxtliyin qarşısını ala bilər. Qeyd edək ki, fen-şuy elmi cəhətdən sübut edilmiş metod deyil və bu cür yanaşmalar qədim inanclara və ənənələrə əsaslanır.
Giriş qapısının qarşısında güzgü
Güzgü dəhlizin ən praktik əşyalarından biridir. Çünki evdən çıxmazdan əvvəl insan adətən görünüşünə son dəfə baxmaq istəyir. Lakin fen-şuya görə, güzgünün yerləşdirildiyi yer xüsusi əhəmiyyət daşıyır.
Güzgü birbaşa giriş qapısının qarşısında yerləşdirilərsə, bunun uğur enerjisinin evə daxil olmasına mane olduğu düşünülür. İnanca görə, evə daxil olan uğur və rifah enerjisi güzgüdən əks olunaraq yenidən qapıdan çölə çıxır. Həll yolu olaraq güzgünü giriş qapısının sağ və ya sol tərəfindəki divara yerləşdirmək tövsiyə olunur.
Qurumuş güllər və solmuş bitkilər
Bir çox insan qaranlıq dəhlizi daha rahat və gözəl göstərmək üçün bitkilərdən istifadə edir. Lakin fen-şuya görə, qurumuş və ya solmuş bitkilər durğun, cansız enerjini simvolizə edir.
İnanca əsasən, belə bitkilərin girişdə olması yorğunluq, motivasiya çatışmazlığı və maliyyə çətinlikləri ilə əlaqələndirilir. Qurumuş güllərin həm də keçmişdən yapışmağı simvolizə etdiyi və yeni imkanların gəlməsinə mane olduğu düşünülür. Buna görə də dəhliz üçün sağlam, yaşıl yarpaqlı və az işıqda da yaşaya bilən canlı bitkilər seçmək tövsiyə edilir.
Ayaqqabı və palto yığınları
Dəhlizdə ən çox rast gəlinən problemlərdən biri gündəlik tələskənlik səbəbindən yaranan səliqəsizlikdir. Ayaqqabıları döşəmədə saxlamaq və paltoları nizamsız şəkildə yığmaq rahat görünsə də, fen-şuya görə, bu, enerji baxımından əlverişli sayılmır. Fen-şuyda qarışıqlığın zehni və mənəvi maneələr yaratdığına inanılır.
Ayaqqabıların küçədən toz və gərginlik gətirdiyi, ətrafa səpələndikdə isə evə daxil olan enerjinin ilişib qaldığı düşünülür. Bunun ailədaxili mübahisələrə, stressə və maliyyə qeyri-sabitliyinə səbəb ola biləcəyi iddia olunur. Ayaqqabıları qapalı dolablarda saxlamaq, mövsümə uyğun olmayan üst geyimlərini qarderoba yığmaq, göz önündə isə yalnız gündəlik istifadə olunan əşyaları saxlamaq məsləhət görülür.
Sınıq əşyalar və işləməyən saatlar
Bəzən işləməyən saatı divardan götürməyə və ya çatlamış, sınıq dekorativ əşyaları atmağa tələsmirik. Fen-şuya görə, dəhlizdə dayanmış saat həyatın müəyyən bir nöqtədə ilişib qalmasını simvolizə edir.
Sınıq və yapışdırılmış əşyaların isə çatışmazlıq və uğursuzluq hissini gücləndirdiyi düşünülür. Buna görə sınıq əşyaları ya dərhal təmir etmək, ya da onlardan imtina etmək tövsiyə olunur. Saatların batareyası da daim işlək vəziyyətdə olmalıdır.
Qorxuducu tablolar və aqressiv simvollar
Dəhliz üçün tablo və digər dekorativ elementlər seçərkən onların yaratdığı vizual təəssürata diqqət yetirmək tövsiyə olunur. Fırtınalı dəniz təsvirləri, tənha insan şəkilləri və ya ov trofeyləri fen-şuya görə mənfi enerji ilə əlaqələndirilir.
Aqressiv və kədərli simvolların evdə gərginlik yaratdığı, ov trofeylərinin isə dağıdıcı və münaqişəli enerjini simvolizə etdiyi düşünülür. Bunun əvəzinə dəhlizi təbiət təsvirləri, sakitlik yaradan tablolar və inkişaf, bolluq rəmzi hesab edilən motivlərlə bəzəmək məsləhət görülür.
