Müəllim ömrü — zərrə-zərrə əriyən, lakin əridikcə ətrafına işıq saçan bir şamın hekayəsidir. Hər il oktyabrın 5-də qeyd olunan Beynəlxalq Müəllimlər Günü sadəcə təqvimdəki bir bayram deyil; bu tarix ömrünü şagirdlərinin maariflənməsinə, savadlanmasına və bir şəxsiyyət kimi yetişməsinə həsr edən fədakar insanlara göstərilən ali ehtiramın rəmzidir. Həmçinin müəllimlik peşəsi yalnız sinif otağında dərs keçməkdən ibarət deyil. Bu, gələcəyi inşa etmək, körpə qəlblərə vətən sevgisini, elmin sirlərini və insani dəyərləri aşılamaq sənətidir.
Ömrünü bu müqəddəs yola verən bir müəllim hər gün şagirdlərinin uğurları ilə yenidən doğulur, onların sevinci ilə sevinir, kədəri ilə kədərlənir. Bir insanın həyatına toxunmaq, onun qaranlıq yollarını elmin çırağı ilə işıqlandırmaq müəllim ömrünün ən böyük mükafatı və mənasıdır.
5 oktyabr – Beynəlxalq Müəllimlər Günü ərəfəsində Mingəçevir şəhər Noel Ahəngari adına 13 nömrəli tam orta məktəbin keçmiş direktoru, tanınmış təhsil işçisi və pedaqoq,”Əməkdar Müəllim” Tünzalə Seyidova ilə görüşüb ötən illərin xatirələrinə qayıtdıq. Bu, həqiqətən də çox dəyərli və təsirli bir görüş oldu. Müəllimlər günü ərəfəsində insanın üzərində əməyi olan bir müəllimlə illər sonra yenidən bir araya gəlmək, köhnə xatirələri vərəqləmək ən gözəl və unudulmaz anlardan biri oldu desək yanılmarıq.
Tünzalə müəlliməyə olan bu diqqət və vəfa borcumuz həm ona böyük bir sevinc bəxş etdi, həm də keçmişə gözəl bir səyahət oldu . Uzun illər bu təhsil müəssisəsinə rəhbərlik edən Tünzalə müəllim, məktəbin idarə olunmasında, təlim-tərbiyə prosesinin təşkilində və gənc nəslin yetişməsində böyük əmək sərf etmişdir.
O, xüsusilə 2019-2020-ci illərdə Heydər Əliyev Fondu tərəfindən məktəbin tamamilə yenidən bərpa olunaraq müasir səviyyədə istifadəyə verilməsi dövründə də rəhbərlik fəaliyyətini davam etdirmişdir. Hazırda yaş həddi ilə bağlı olaraq təqaüddədir.
Tünzalə xanımla söhbət əsnasında necə oldu ki,məhz müəllimlik peşəsinə üz tutdunuz sualımıza böyük məmuniyyətlə bildirdi ki,bu peşənin sirləri ona anasından keçib:”Müəllim –elm,bilik xəzinəsinin qapısını insanların üzünə açan müqəddəs varlıqdır.Bu xəzinəyə daxil olanlar həyatın enişli-yoxuşlu yollarında büdrəmir,öz biliyi və əməyiilə cəmiyyətin inkişafına töhfələr verirlər”.
Tünzalə xanım,sizi pedoqoji fəaliyyətiniz dövründə daha çox sevindirən nə olub?
-Məni ən çox həyatda sevindirən cənab Prezidentin əməyimə verdiyi fəxri ad,bir də mənim şagirdlərimin hal-hazırda xarici ölkələrdən gələn xoş soraqlarıdır.Müəllim nə ilə fəxr edə bilər?…Müəllimin qiymətini kim verə bilər?
“Əlbəttə onun yetişdirdiyi şagirdlər,cəmiyyətimiz üçün yetişdirdiyi şəxsiyyətlərdir.
“Mən fəxr edirəm ki,mənə görə neçə nəfər biologiya müəllimi olub.Hazırda da mənim dəsti-xəttimi davam etdirən,məni özünə ideal seçmiş 16 saylı məktəbdə Aliyə Müəllimdir. Çox yaxşı istedadlı müəllimdir”.
Qeyd edək ki,Tünzalə Seyidova uzunmüddətli səmərəli pedaqoji fəaliyyətinə və Azərbaycan təhsilinin inkişafındakı xidmətlərinə görə ölkə rəhbərliyi tərəfindən “Əməkdar müəllim” fəxri adı ilə təltif olunmuşdur. Onu da qeyd etmək lazımdır ki, “Əməkdar müəllim” fəxri adı bir pedaqoqun fəaliyyətinə verilən ən ali dövlət mükafatlarından biridir və Tünzalə xanım bu adı fədakar əməyi ilə qazanmış ziyalılardandır.
Onun uzunillik pedaqoji və idarəçilik fəaliyyəti dövründə qazandığı uğurlar nəticəsində Mingəçevir şəhər Noel Ahəngari adına 13 nömrəli tam orta məktəbə rəhbərlik etdiyi dövrdə məktəb şəhərin qabaqcıl təhsil ocaqlarından birinə çevrilmişdir. Xüsusilə məktəb binasının əsaslı şəkildə yenidən qurulması və müasir avadanlıqlarla təmin olunması prosesində bir direktor kimi böyük əmək sərf etmişdir. Tünzalə müəllim təkcə şagirdlərin deyil, həm də gənc müəllimlərin pedaqoji mühitə uyğunlaşması, müasir kurikulum metodlarını mənimsəməsi üçün böyük bir məktəb olmuşdur.
Onu da qeyd etməyə dəyər ki,Tünzalə xanımın uğurları təkcə pedaqoji fəaliyyəti ilə məhdudlaşmır. O,həm də ətrafımıza nur saçan, zərifliyi və xanım-xatınlığı ilə seçilən, səmimi və böyük ürəyə sahib olan bir ziyalıdır. Tünzalə xanım yalnız peşəkar uğurları ilə deyil, həm də ailəyə,həkim yoldaşı Əhməd Seyidova bütöv bir qadın xoşbəxtliyi bəxş edib. O,həm gözəl bir ailənin dayağı, qızlarının sevgi dolu anası, həm də 3 nəvələrinin canından əziz olan qayğıkeş nənədir. Tünzalə xanımın sehirli, qızıl kimi əl qabiliyyəti, yaratdığı hər bir gözəllik isə onun daxili dünyasının , zövqünün və zəhmətsevərliyinin bariz nümunəsidir desək yanılmarıq.
Bu əlamətdar gündə Sizi ürəkdən təbrik edir, ailənizlə, qızlarınız və nəvələrinizlə birlikdə keçirəcəyiniz uzun, sağlam və xoşbəxt ömür arzulayırıq. Bayramınız mübarək, əziz Tünzalə xanım!
Esmira Hidayətova,Mingəçevir.
