“Niderland və Belçikanın parlamentində sülh prosesinə ciddi şəkildə xələl gətirən bir sənəd qəbul edildi. Hesab edirəm ki, hər iki ölkənin parlamentləri arasında eyni vaxtda sinxronlaşdırılmış, əlaqələndirilmiş şəkildə qəbul edilən bu qətnamələr məhz regionumuzda baş verən sülh prosesinə çox ciddi zərbədir. Bu, Azərbaycanın daxili işlərinə qarışmaq deməkdir, bir cəhddir, suverenliyimizə qarşı yönəlmiş qətnamədir. Ona görə də biz bunu qətiyyətlə rədd edirik. Hər iki ölkə parlamentinin qəbul etdiyi qətnamələri rədd edirik”.

Bu fikirləri Milli Məclisin plenar iclasında deputat Tural Gəncəliyev bildirdi.

Onun sözlərinə görə, təbii ki, parlamentimizin bununla bağlı çox tutarlı açıqlaması və bəyanatı var:

“Eyni zamanda Xarici İşlər Nazirliyi hər iki ölkənin səfirlərini çağırıb, onlara ciddi irad bildirilib. Bilirsiniz, həmin qətnamədə regionumuzda gedən müsbət proseslər, Azərbaycanın humanist jesti, Ermənistana qarşı məhdudiyyətləri aradan qaldırmağımız, Ermənistana göndərilən humanitar yardımlar, Azərbaycan üzərindən keçməklə və yaxud bizim Ermənistana göndərdiyimiz neft məhsulları haqqında bir kəlmə belə qeyd olunmayıb. Təbii ki, bu da qərəzin göstəricisidir. Hesab edirəm ki, adətən demokratiyadan, insan hüquqlarından danışanların özləri ən çox demokratiyanı pozanlar, insan hüquqlarına hörmətsiz yanaşanlar olub. Həmin ölkələrin parlamentlərindən heç vaxt nə müasir dövrdə, nə keçmişdə, nə də yaxın tarixdə yeni müstəmləkəçilik siyasəti və yaxud keçmiş müstəmləkəçilik siyasətləri haqqında danışıldığını görməmişik. Ancaq başqalarına barmaq uzatmaq, başqalarının təqsirini axtarmaqla məşğuldurlar”.