İlk öncə Mingəçevir Şəhər İcra Hakimiyyətinin başçısı İlham İsmayılov, icra hakimiyyətinin məsul əməkdaşları, şəhər ictimaiyyətinin nümayəndələri, idarə və müəssisə rəhbərləri, Mingəçevir Dövlət Universitetinin rəhbərliyi və digər təhsil müəssisələrinin rəhbərləri Mingəçevir şəhər Şəhidlər xiyabanında ucaldılmış Xocalı faciəsi qurbanlarının xatirəsinə həsr olunmuş xatirə kompleksini ziyarət ediblər. Abidə-kompleksinin önünə gül dəstələri düzülüb, faciə qurbanlarının əziz xatirəsi dərin ehtiramla yad olunub.
Daha sonra anım mərasimi icra hakimiyyətinin inzibati binasında davam etdirilib. Tədbirdə Xocalı soyqırımı qurbanlarının və Vətən uğrunda canından keçmiş şəhidlərin xatirəsi bir dəqiqəlik sükutla anılıb.
Tədbirdə çıxış edən Mingəçevir şəhər İcra Hakimiyyətinin başçısı İlham İsmayılov Xocalı faciəsinin xalqımızın tarixində ən qanlı və faciəli səhifələrdən biri olduğunu bildirib. O qeyd edib ki, 1992-ci ilin fevralında baş verən bu dəhşətli hadisə dinc əhaliyə qarşı törədilmiş soyqırımı aktıdır.
İcra başçısı vurğulayıb ki, Xocalı həqiqətlərinin dünya ictimaiyyətinə çatdırılmasında Azərbaycanın mərd və cəsarətli jurnalistlərinin xüsusi rolu olub:
“O ağır günlərdə həyatlarını riskə ataraq hadisə yerindən reportajlar hazırlayan, faktları sənədləşdirən Azərbaycan jurnalistləri Xocalıda törədilən vəhşilikləri dünya ictimaiyyətinə çatdırdılar. Onların çəkdikləri kadrlar və yaydıqları məlumatlar sayəsində beynəlxalq aləm bu faciənin əsl mahiyyətini gördü. Bu, həqiqətin susdurulmadığının bariz nümunəsidir.”
Daha sonra İlham İsmayılov faciə barədə geniş nitq söyləyərək bildirib:
“Xocalı soyqırımı təkcə bir şəhərin deyil, bütün Azərbaycan xalqının faciəsidir. Günahsız körpələrin, qadınların, qocaların amansızlıqla qətlə yetirilməsi insanlığa qarşı ən ağır cinayətlərdən biridir. Lakin xalqımız bu ağrını ləyaqətlə daşıdı, birliyini və mübarizə əzmini daha da möhkəmləndirdi. Şəhidlərimizin qanı yerdə qalmadı. Bu gün azad torpaqlarımızda üçrəngli bayrağımızın dalğalanması Xocalı qurbanlarının ruhuna ən böyük ehtiramın ifadəsidir. Biz onların xatirəsini daim uca tutacaq, həqiqətləri gələcək nəsillərə çatdıracağıq.”
Çıxışlarda qeyd olunub ki, Ümummilli Lider Heydər Əliyevin təşəbbüsü ilə Xocalı soyqırımına dövlət səviyyəsində siyasi qiymət verilib, Prezident İlham Əliyev tərəfindən isə faciənin beynəlxalq miqyasda tanıdılması istiqamətində ardıcıl siyasət həyata keçirilir.
Qeyd edək ki, Mingəçevir şəhərində Xocalı soyqırımının 34-cü ildönümü ilə bağlı anım tədbirləri davam etdirilir.
Esmira Hidayətova, Mingəçevir
