Martın 17-də Mingəçevir şəhərinin Az.İES yaşayış massivində yerləşən şəhər Mədəniyyət Mərkəzinin qarşısında İlaxır çərşənbə münasibətilə geniş bayram tədbiri təşkil olunub. Baharın gəlişini, yenilənmə və dirçəlişi simvolizə edən bu əlamətdar gün münasibətilə keçirilən tədbir şəhər sakinlərinin böyük marağı ilə qarşılanıb.
Tədbirdə Mingəçevir Şəhər İcra Hakimiyyətinin başçısı İlham İsmayılov, hüquq-mühafizə orqanlarının rəhbərləri, ictimaiyyət nümayəndələri, eləcə də qəsəbə sakinləri iştirak ediblər.
Bayram şənliyi milli ənənələrə uyğun şəkildə təşkil olunaraq, iştirakçılara unudulmaz anlar yaşadıb.
Tədbir çərçivəsində qədim türk mədəniyyətinin rəmzi obrazları olan Dədə Qorqud və Bahar qızı səhnəyə çıxaraq şəhər sakinlərini İlaxır çərşənbə münasibətilə səmimi qəlbdən təbrik ediblər, onlara bolluq, ruzi-bərəkət və firavanlıq arzulayıblar.
Bayram proqramı daha sonra xalq arasında sevilən Keçəl və Kosa obrazlarının məzəli səhnəcikləri ilə davam edib. Onların şən və maraqlı çıxışları tədbir iştirakçılarına xoş əhval-ruhiyyə bəxş edib, xüsusilə uşaqların böyük sevincinə səbəb olub.
Şənlik musiqi kollektivlərinin təqdim etdiyi rəngarəng konsert proqramı ilə davam etdirilib. Milli musiqilər, rəqslər və ifalar bayram ab-havasını daha da yüksəldərək tədbirə xüsusi rəng qatıb. Axşam boyu davam edən konsert proqramı şəhər sakinlərinə əsl bayram ovqatı yaşadıb.
Beləliklə, Mingəçevirdə keçirilən İlaxır çərşənbə tədbiri qədim milli adət-ənənələrimizin yaşadılması və gələcək nəsillərə ötürülməsi baxımından xüsusi əhəmiyyət kəsb edib və iştirakçılara xoş xatirələrlə yadda qalıb.
Esmira Hidayətova, Mingəçevir
