Azərbaycan Respublikasında 2026-cı ilin “Şəhərsalma və Memarlıq İli” elan edilməsi haqqında Azərbaycan Respublikası Prezidentinin Sərəncamı əsasında ölkəmizdə şəhərsalma və memarlıq sahəsinin inkişafına, müasir şəhər mühitinin formalaşdırılmasına xüsusi diqqət yetirilir. Bu istiqamətdə Mingəçevir şəhərində də çoxmənzilli yaşayış binalarında aparılan təmir-bərpa və abadlıq işləri şəhərin müasir görkəminin formalaşdırılmasına mühüm töhfə verir. Yaşayış binalarının fasadlarının yenilənməsi, ümumi istifadədə olan ərazilərin abadlaşdırılması və binaların xarici görünüşünün yaxşılaşdırılması şəhər mühitinin daha səliqəli, estetik və baxımlı olmasına xidmət edir. Həyata keçirilən təmir və abadlıq tədbirləri Mingəçevir şəhərinin memarlıq simasının daha da gözəlləşdirilməsinə, sakinlər üçün daha rahat və əlverişli yaşayış mühitinin yaradılmasına yönəlib. Bu işlər “Bakı Abadlıq Xidməti” MMC tərəfindən aparılır.
Çoxmənzilli yaşayış binalarında təmir-bərpa işlərinin aparılması zamanı müəyyən çətinliklər də yaranır. Belə ki, bəzi sakinlər mənzillərin eyvanının təmir edilməsinə razılıq vermirlər.
Bildiririk ki, şəhər ərazisində yerləşən hündürmərtəbəli yaşayış binaları dövlət mənzil fonduna aiddir. Həmin binaların saxlanılmasına və istismarına Şəhər İcra Hakimiyyətinin tabeliyində olan qurumlar cavabdehdir. Hal-hazırda Mənzil Təsərrüfatı və Abadlaşdırma idarəsinin balansında olan hündürmərtəbəli yaşayış binalarında “Bakı Abadlıq Xidməti” MMC tərəfindən əsaslı təmir işləri aparılır.
Şəhərin müasir arxitektur görünüşünün bərpası ilə bağlı yaşayış binalarında aparılan təmir işlərinə sakinlərin anlayışla yanaşmasını xahiş edirik.
Esmira Hidayətova, Mingəçevir
