“Capgemini” şirkətinin illik “World Wealth Report” hesabatına görə, ötən il dünyada milyonçuların sayı 2 milyon nəfər artaraq 25,3 milyona çatıb.

Qlobal sərvətin ümumi həcmi isə 8,7% artaraq 98,3 trilyon dollara yüksəlib. Bu, 2018-ci ildən bəri ən yüksək artım tempi kimi qeyd olunur.

Hesabata əsasən, sərvət artımı demək olar ki, bütün regionlarda müşahidə olunub. Yalnız Yaxın Şərq istisna təşkil edib.

Analitiklər bu artımı fond bazarlarının güclənməsi və inflyasiyanın azalması ilə izah edirlər. Xüsusilə yarımkeçiricilərə olan yüksək qlobal tələbat Asiya bazarlarını dəstəkləyib və bölgədə yeni milyonçuların sayını artırıb.

Ən böyük artım ABŞ-da qeydə alınıb — 736 min yeni milyonçu. Ümumi sayı 8,7 milyon nəfərə çatıb.

Asiya-Sakit okean regionunun milyonçuların sayı 9,4%, ümumi sərvət isə 10,5% artıb. Yaponiya və Çin ən yüksək nəticə göstərən ölkələr olub (müvafiq olaraq 436 min və 154 min yeni milyonçu).

2024-cü ildəki geriləmədən sonra 2025-ci ildə Avropada milyonçuların sayı 6,5% artıb. Ən yüksək artım Lüksemburqda (13,5%), Almaniyada (11,1%), Fransa və Böyük Britaniyada isə daha zəif templə qeydə alınıb.

Afrika regionunda artım 4,1% olub. Əsas səbəb qiymətli metalların bahalaşmasıdır. Ən böyük artım Mərakeşdə (16,8%) qeydə alınıb.

Yeganə azalma müşahidə olunan region Yaxın Şərq olub — 1,4% eniş. Buna regional münaqişələr, neft qiymətlərinin azalması və iqtisadi fəallığın zəifləməsi səbəb göstərilir.

Hesabatda vurğulanır ki, ümumilikdə dünya üzrə sərvət artımı qlobal maliyyə bazarlarının sabitləşməsi ilə əlaqədardır.