“Instagram”ın rəhbəri Adam Mosseri insanların xəbəri olmadan görüntülərinin çəkilərək sonradan onları təhqir etmək məqsədilə platformada paylaşılmasının qəbuledilməz olduğunu bildirib.

Onun sözlərinə görə, belə məzmunların qarşısını almaq üçün müxtəlif nəzarət mexanizmlərindən istifadə ediləcək.

Bununla belə, “Meta” hesabların hansı prosedur əsasında bağlanacağı və yeni qaydaların necə tətbiq ediləcəyi barədə hələlik ətraflı məlumat verməyib.

“Business Insider”in məlumatına görə, ağıllı eynəklərlə çəkilmiş zarafat videoları paylaşan iki məşhur “Instagram” hesabı yaxın vaxtlarda bağlanıb. **”Meta”** həmin hesabların yeni təhqiramiz məzmun siyasəti çərçivəsində bloklandığını təsdiqləyib.

Şirkətin qərarı ağıllı eynəklərlə bağlı son dövrlər artan tənqidlər fonunda qəbul edilib. Müzakirələrin əsas səbəbi bu cihazların ətrafdakı insanların xəbəri olmadan video çəkə bilməsidir.

Ağıllı eynəklərdə çəkiliş zamanı kiçik işıq indikatoru yansa da, istifadəçilər bu işığın söndürülə və ya gizlədilə bildiyini nümayiş etdiriblər. Bu isə insanların razılığı olmadan görüntülərinin qeydə alınması ilə bağlı narahatlıqları artırıb.

Son aylarda ağıllı eynəklərlə bağlı mübahisələr daha da genişlənib. Məlumata görə, bəzi idmançılar bu cihazlardan istifadə etdiklərinə görə yarışlardan uzaqlaşdırılıb, bəzi istifadəçilər isə hüquqi məsuliyyətlə üzləşiblər.

ABŞ-ın Nyu-York ştatında da ağıllı eynəklərin məhkəmə zallarında istifadəsi qadağan edilib.

Müğənni Lorde də bu texnologiya ilə bağlı narahatlığını ictimaiyyətlə bölüşüb. Buna baxmayaraq, “Meta” reklam kampaniyaları vasitəsilə ağıllı eynəklərini daha geniş auditoriyaya təqdim etməyə davam edir.

Bir tərəfdən “Meta” ağıllı eynəklərin gizli çəkiliş məqsədilə istifadəsinə qarşı olduğunu bəyan edir, digər tərəfdən isə fasiləsiz video qeydiyyatı apara bilən yeni nəsil ağıllı eynəklər üzərində işlədiyi barədə iddialar gündəmdə qalır.

Bu səbəbdən şirkətin məxfilik siyasəti ətrafında müzakirələrin yaxın dövrdə də davam edəcəyi gözlənilir.