Region mətbuatı, təhsil və gənclik – Kamal Əhmədovla söhbət Müsahibimiz:
Mingəçevir Turizm Kollecinin direktoru Kamal Əhmədov
Qeyd: Növbəti müsahibimiz Mingəçevir Turizm Kollecinin direktoru Kamal Əhmədovdur. Xatırladaq ki, Kamal Əhmədov Mingəçevirin ən fəal gənclərindən biri kimi tanınıb.
Esmira Hidayətova: Kamal müəllim, xoş gördük. Müsahibəmizə başlamazdan əvvəl sizi dinləyək.
Kamal Əhmədov: Çox sağ olun. Müsahibəyə başlamazdan əvvəl mətbuat nümayəndələrini Milli Mətbuatın 151-ci ildönümü münasibəti ilə səmimi qəlbdən təbrik edirəm. Sizlərə ən xoş arzularımı çatdırır, bu şərəfli və məsuliyyətli işinizdə tükənməz enerji, yaradıcı uğurlar və cansağlığı arzulayıram. Cəmiyyətimizin məlumatlandırılmasında və inkişafında oynadığınız böyük rol çox dəyərlidir.
Esmira Hidayətova: Təşəkkür edirik. Keçək suallarımıza: Təhsil müəssisəsinin fəaliyyəti ilə bağlı xəbərlərin işıqlandırılmasında bölgə mətbuatının rolunu necə qiymətləndirirsiniz?
Kamal Əhmədov: Təhsil müəssisələrinin fəaliyyətinin işıqlandırılmasında bölgə mətbuatı həlledici və əvəzedici rola malikdir. Media ictimaiyyəti informasiya ilə yaxından tanış edir, təhsil və ya digər yenilikləri birbaşa valideynlərə çatdırır və regionlardakı təhsil problemlərinin həllinə ictimai diqqət çəkir. Amma etiraf etməliyəm ki, arada boşluqlar görürəm. Məndən heç bir media nümayəndəsi inciməsin, lakin bölgə mətbuatının fəaliyyətini zəif hesab edirəm. Təəssüf ki, cəmiyyətimizdə sosial şəbəkələr vastəsilə qeyri-professional formada əsası olmayan və ya araşdırılmayan məlumatlar paylaşılır və oxucular arasında mənfi fikir formalaşdırılır. Jurnalistikanın qızıl qaydası hadisəni birtərəfli deyil, hər iki tərəfin rəyini öyrənərək təqdim etməkdir. Bir tərəfin fikrinin öyrənilməsi obyektivliyi tamamilə itirir. Bu cür yanaşma həm təhsil müəssisəsinin nüfuzuna zərbə vurur, həm də cəmiyyətdə bölgə mətbuatına olan etibarı azaldır. Müasir jurnalistika nümayəndələrindən və öndə gedən onlayn media portallarından gözləntimiz, öz imkanlarından yararlanaraq oxucular arasında yayılmış məlumatların araşdırılması və insanlarda doğru fikrin formalaşmasına dəstək olmaqdır.
Esmira Hidayətova: Onlayn media ilə əməkdaşlıq tələbə və abituriyentlərin məlumatlandırılmasına hansı təsiri göstərir?
Kamal Əhmədov: Onlayn media ilə əməkdaşlıq tələbə və abituriyentlərin məlumatlandırılmasında həlledici rol oynayır desəm, yanılmaram. Bu, onlara imtahan qaydaları, ixtisas seçimi və yeniliklər barədə operativ, əlçatan və çevik məlumat əldə etməyə birbaşa kömək edir. Bizim kollecin də öz onlayn səhifəsi var, bütün məlumatlar orada yerləşdirilir və tələbələr yeniliklərdən operativ xəbərdar olurlar. Bu əlaqə gənclərin karyera qərarlarını daha məlumatlı şəkildə vermələrinə müsbət təsir göstərir.
Esmira Hidayətova: Region mediasının gənclərin maarifləndirilməsində rolunu necə görürsünüz?
Kamal Əhmədov: Region mediası yerli gənclərin dünyagörüşünün formalaşmasında, vətəndaşlıq mövqeyinin inkişafında və regiondakı sosial proseslərə inteqrasiyasında əsaslı rol oynayır. Bu media vasitələri gəncləri yerli imkanlar, karyera perspektivləri və ictimai təşəbbüslər barədə məlumatlandırmaq üçün vacib bir körpüdür. Gənclərimizin milli ruhda, vətənpərvərlik və yüksək biliklərlə yetişməsini istərdim və region mediasının gənclərin maariflənməsində həmişə onların yanında olması daha məqsədəuyğun olardı.
Söhbətləşdi Esmira Hidayətova
