“İran qonşuları ilə dostluğa inanır və yalnız bu ölkələrdəki ABŞ hərbi bazalarına hücum edir”.

Bu barədə İranın yeni Ali Lideri Müctəba Xamenei ölkənin dövlət televiziya və radio şirkətində yayımlanan ilk rəsmi açıqlamasında bildirib.

“Biz bu yaxınlarda ABŞ hərbi bazalarına zərbələr endirdik. Xəbərdarlıq etdiyimiz kimi, qonşu ölkələrə hücum etmədən sadəcə bu bazaları hədəf aldıq. Qonşularımızla dostluğa inansaq da, gələcəkdə bu hərəkətləri davam etdirməyə məcbur olacağıq”, – deyə o qeyd edib.

O həmçinin müharibənin davam etdiyi müddətdə Hörmüz boğazının bağlı qalmalı olduğunu qeyd edib. Müctəba Xameneininin fikrincə, Tehran Yaxın Şərqdəki münaqişədə Hörmüz boğazını bir vasitə kimi istifadə etməlidir.

İranın Ali Lideri Müctəba Xamenei atasını və həyat yoldaşını itirdiyini bildirib.

“Bunu mən yaxınlarını itirən insanlarla bölüşürəm. Çünki mən də atamı itirmişəm, həyat yoldaşımı itirmişəm. Bacım isə həm övladını, həm də şəhid olan həyat yoldaşını itirib. Amma bütün bu faciələri daha yüngül keçirməyimizə kömək edən şey Allahın mərhəmətinə olan inam və səbrin bu problemi həll etməyə kömək edəcəyini dərk etməyimizdir. Hamını əmin edirəm ki, şəhidlərimizin qisasını almaq məsələsini heç vaxt unutmacağıq. Söhbət təkcə onların ali liderimizi öldürməsindən getmir. Söhbət müharibə zamanı öldürülən hər bir həmvətənimizdən gedir”, – deyə Xamenei bildirib.