7 mart 2026-cı il tarixində Mingəçevir Dövlət Dram Teatrında yeni formatda hazırlanmış tamaşanın premyerası baş tutub. Tamaşa teatrsevərlər və şəhər ictimaiyyəti tərəfindən böyük maraqla qarşılanıb.
Premyerası təqdim olunan romantik komediya janrında olan “Nişanlı Qız” tamaşası Azərbaycan dramaturgiyasının görkəmli nümayəndələrindən biri olan Sabit Rəhmanın eyniadlı pyesi əsasında səhnələşdirilib. Tamaşaya tanınmış kinorejissor və teatr rejissoru, “Tərəqqi” medalı laureatı Cavid Təvəkkül quruluş verib. Layihənin ikinci rejissoru isə Prezident mükafatçısı İbrahim Türksoy Salamov olub.
Rejissor Cavid Təvəkkül əsərə fərqli və müasir yanaşma tətbiq edərək klassik süjeti yeni səhnə həlli ilə təqdim edib. Tamaşa xüsusilə gənclərin zövqünə uyğun formada hazırlanıb və səhnə tərtibatı, aktyor oyunu ilə diqqət çəkib.
Qeyd edək ki, 2025–2026-cı illər teatr mövsümü ərzində Mingəçevir Dövlət Dram Teatrında rejissorlar Cavid Təvəkkül və İbrahim Türksoy Salamov tərəfindən birgə hazırlanan tamaşalar və dövlət tədbirləri teatrın fəaliyyətində yeni dinamikanın yarandığını göstərir. Bu layihələr şəhər ictimaiyyəti ilə yanaşı, yaxın şəhər və rayonlardan gələn tamaşaçıların da böyük rəğbətini qazanır.
Məlumat üçün bildirək ki, 7 mart 2026-cı il tarixində tamaşaçılara təqdim olunan “Nişanlı Qız” romantik komediyası Space TV tərəfindən tam şəkildə lentə alınıb və yaxın vaxtlarda televiziya tamaşaçılarına da təqdim olunacağı gözlənilir.
İdealxebər.az
