Mingəçevir şəhər Texniki Humanitar Liseydə kitab bağışlanma aksiyası təşkil olunub. Tədbirin təşkilatçıları bildiriblər ki, bu təşəbbüs ötən ilin 14 fevral tarixindən etibarən ənənə halını alıb və hər il davam etdirilməsi qərara alınıb.
Aksiyanın əsas məqsədi şagirdlər arasında kitab oxuma mədəniyyətini təşviq etmək, mütaliəyə marağı artırmaq və kitab paylaşımı ənənəsini formalaşdırmaqdır. Təşkilatçılar qeyd ediblər ki, oxu mədəniyyətinə qayıdış təşəbbüsü məktəb ictimaiyyəti tərəfindən müsbət qarşılanıb.
Bu il keçirilən tədbirdə püşkatma yolu ilə şagirdlərə müxtəlif kitablar hədiyyə olunub. Bundan əlavə, liseyin direktoru Nailə Məmmədova da aksiyaya qoşularaq Min möhtəşəm günəş kitabını şagirdlərə bağışlayıb.
Tədbir iştirakçıları belə aksiyaların digər ümumtəhsil müəssisələrində də davam etdirilməsinin arzuolunan olduğunu vurğulayıblar.
