Bu gün 78 yaşlı şəhid anası Səmayə İsmayılova üçün zamanın dayandığı gündür. Tam 34 il əvvəl onun oğlu — Vətən uğrunda canından keçən şəhid Yalçın İsmayılov şəhidlik zirvəsinə ucalıb.
Yalçın İsmayılov Birinci Qarabağ müharibəsində torpaqlarımızın müdafiəsi uğrunda gedən döyüşlərdə qəhrəmancasına şəhid olub. Onun əbədiyyətə qovuşmasından 34 il keçsə də, adı, xatirəsi və Vətən yolunda göstərdiyi fədakarlıq unudulmayıb.
Şəhid Yalçın İsmayılov Mingəçevir şəhər Şəhidlər Xiyabanında dəfn edilib. Bu gün onun məzarı qarşısında dayanarkən bir daha anlayırıq ki, şəhidlər üçün zaman anlayışı yoxdur. Onlar illər keçdikcə köhnəlmir, əksinə, xalqın yaddaşında daha da əbədiləşirlər.
Arxada isə bir ana qalıb…
78 yaşlı Səmayə İsmayılova 34 ildir oğul həsrəti ilə yaşayır. Şəhid anasının qəlbində Yalçın üçün zaman heç vaxt keçməyib. Ana üçün oğlunun yaşı dəyişməyib — onun yaddaşında Yalçın həmişə həmin Vətən uğrunda döyüşə gedən oğuldur.
Bir şəhidin ölümü bir ailənin ömrünə sığmayan ağrıdır. Amma həmin şəhidin adı bütöv bir xalqın yaddaşına həkk olunanda onun həyatı əbədiyyətə çevrilir.
Yalçın İsmayılov da bu əbədiyyət yolunu seçənlərdəndir.
Bu gün — şəhidlik zirvəsinə ucalmasının 34-cü ildönümündə onun əziz xatirəsini ehtiramla yad edir, şəhid anası Səmayə İsmayılovaya isə sonsuz səbr və möhkəm can sağlığı arzulayırıq.
Şəhidlər ölmür. Onlar Vətən yaşadıqca yaşayırlar.
Yalçın İsmayılovun ruhu qarşısında baş əyirik.
Allah bütün şəhidlərimizə rəhmət eləsin!
Esmira Hidayətova, Mingəçevir
