“Azərbaycanın su ehtiyatları azdır. 40% su itkisi gələcəkdə Azərbaycanın ərzaq təhlükəsizliyimizi sual altına sala bilər”.
Bunu Qaynarinfo-ya açıqlamasında ekoloq Xosrov Musayev Azərbaycanın 2050-ci ilə qədər susuzluqdan əziyyət çəkən 35 ölkə içərisində olacağı ilə bağlı məlumata aydınlıq gətirərkən deyib. Ekoloq bu istiqamətdə müəyyən addımların atılmasının vacibliyini vurğulayıb:
“Suvarılan ərazilərin sayı artırılmalıdır, sudan qənaətlə istifadə olunmalıdır. Torpaq mənşəli kanallar beton üzlüklərlə əvəz olunmalıdır. Hamı bilir ki, Azərbaycanın su ehtiyatlarının 72% kənarda formalaşır. Bizim əsas çaylarımız Kür və Arazdır. Su qıtlığı isə gözləniləndir. Dünyanın 200 ölkəsi var, onun içərisində 35-ci yerdə olmaq təhlükəlidir. Azərbaycanın su ehtiyatlarının 25%-i işğaldan azad olunan ərazilərimizdədir. O vaxt bizə qarşı ermənilər su müharibəsi elan etmişdi, Sərsəng su anbarının qarşısını kəsib bizə su baraxmırdılar”.
Xosrov Musayev Sərsəng su anbarı və Suqovuşanın təmir olunmasının nəzərdə tutulduğunu qeyd edib:
“Həmin anbarlara su gətirən kanallar yoxdur. Amma kanallar dağılıb, yenidən qurulmalıdır. Dünyada baş verən ərzaq qıtlığının bir səbəbi də sudur. Çünki su olmasa, kənd təsərrüfatı məhsullarının istehsalından söhbət gedə bilməz”.
Xatırladaq ki, kənd təsərrüfatı nazirinin müavini Zaur Əliyev Azərbaycanın su ehtiyatlarının azaldığını açıqlayıb. O, Azərbaycanın 35 ölkəlik risk qrupunda olduğunu bildirib: “Beynəlxalq təşkilatların hesablamalarına görə, ölkəmiz 2050-ci ilə qədər susuzluqdan əziyyət çəkən 35 ölkə içərisində olacaq. Bu da bir növ aqrar sektorun transformasiyasında resurs əsaslı yanaşmanın da labüd olduğunu ortaya qoyur. Dövlət Proqramı da əsas hədəfləri müasir suvarma altında olan sahələrin 130 min hektardan 300 min hektara qədər çatdırılmasını hədəfləyir”.
