Tehran aparılan danışıqlar çərçivəsində Birləşmiş Ştatlardan kompensasiya ödənilməsini və bəzi sanksiyaların aradan qaldırılmasını tələb edir.

Ölkə.az bildirir ki, bu barədə İran İslam Respublikasının Xarici İşlər Nazirliyinin sözçüsü İsmayıl Bəqai keçirdiyi mətbuat konfransında açıqlama verib.

Diplomat qeyd edib ki, aparılan müzakirələrin əsas məqsədi İran dövlətinin hüquqlarının qəbul edilməsi, həmçinin ABŞ və İsrailin hərbi əməliyyatları nəticəsində yaranmış zərərin qarşılanmasıdır.

İsmayıl Bəqai həmçinin bildirib ki, rəsmi İran müharibənin dərhal və tam şəkildə dayandırılmasında israrlıdır. Vurğulanıb ki, qeyd olunan məsələlər İran hökumətinin icrasını tələb etdiyi ən mühüm şərtlərdir.