Bu gün Azərbaycanda Azərbaycan Əlifbası və Azərbaycan Dili Günü qeyd olunur. Əlamətdar gün Azərbaycan dilinin qorunması, inkişaf etdirilməsi və latın qrafikalı əlifbanın tətbiqinin tamamlanmasının tarixi əhəmiyyətini özündə əks etdirir.
Azərbaycan Əlifbası və Azərbaycan Dili Günü ümummilli lider **** tərəfindən imzalanmış 9 avqust 2001-ci il tarixli Fərmana əsasən təsis edilib.
2001-ci ilin avqust ayında ölkədə latın qrafikalı Azərbaycan əlifbasına keçid prosesi tam başa çatdırılıb. Bu mühüm addım Azərbaycan dilinin dövlət dili kimi mövqeyinin daha da möhkəmləndirilməsi, milli-mədəni irsin qorunması və müasir informasiya məkanına inteqrasiyanın sürətləndirilməsi baxımından böyük əhəmiyyət daşıyıb.
Azərbaycan dili xalqımızın milli kimliyini, tarixini və mədəni irsini yaşadan ən qiymətli mənəvi sərvətlərdən biridir. Ana dilinin saflığının qorunması, zənginləşdirilməsi və gələcək nəsillərə ötürülməsi dövlət siyasətinin əsas istiqamətlərindən biri olmaqla yanaşı, hər bir vətəndaşın da mənəvi məsuliyyətidir.
Qeyd edək ki, Azərbaycan Əlifbası və Azərbaycan Dili Günü ölkədə hər il avqustun 1-də qeyd olunur. Bu tarix rəsmi əlamətdar gün olsa da, qeyri-iş günü hesab edilmir.
