12 mart 2026-cı il tarixində Mingəçevir Şəhər İcra Hakimiyyətinin təşkilatçılığı ilə müqəddəs Ramazan ayı münasibətilə geniş iftar süfrəsi təşkil olunub. Tədbirdə Mingəçevir Şəhər İcra Hakimiyyətinin başçısı İlham İsmayılov, şəhər rəsmiləri, şəhid ailələri, qazilər, ağsaqqallar, din xadimləri və şəhər ictimaiyyətinin nümayəndələri iştirak ediblər.
Tədbir başlamazdan əvvəl Azərbaycanın ərazi bütövlüyü və suverenliyi uğrunda canlarından keçmiş qəhrəman vətən övladlarının əziz xatirəsi bir dəqiqəlik sükutla yad edilib.
Mərasimdə çıxış edən Mingəçevir Şəhər İcra Hakimiyyətinin başçısı İlham İsmayılov müqəddəs Ramazan ayının insanların mənəvi dünyasının zənginləşməsində, cəmiyyətdə həmrəylik və mərhəmət hisslərinin güclənməsində mühüm rol oynadığını bildirib. Şəhər rəhbəri qeyd edib ki, Ramazan ayı insanlar arasında birlik, xeyirxahlıq və qarşılıqlı dəstək kimi ali dəyərlərin daha da möhkəmlənməsinə xidmət edir.
İlham İsmayılov çıxışında xalqımıza və dövlətimizə firavanlıq və əmin-amanlıq arzulayıb, şəhidlərimizə Allahdan rəhmət, qazilərimizə möhkəm can sağlığı diləyib. O, həmçinin tutulan orucların, edilən duaların və görülən bütün xeyirxah əməllərin Allah dərgahında qəbul olunmasını arzulayıb.
Tədbirdə Qafqaz Müsəlmanları İdarəsinin Şirvan bölgəsi üzrə qazısı Əli Məmmədov və şəhid anası Nəhayət Həsənova çıxış edərək müqəddəs Ramazan ayının mənəvi dəyərlərindən bəhs edib, belə tədbirlərin cəmiyyətdə birlik və həmrəyliyin güclənməsinə töhfə verdiyini bildiriblər.
Çıxışlarda şəhid ailələrinə və qazilərə göstərilən diqqət və qayğının dövlət siyasətinin prioritet istiqamətlərindən biri olduğu xüsusi vurğulanıb.
Sonda iftar süfrəsi arxasında Azərbaycanın dövlət müstəqilliyi və ərazi bütövlüyü uğrunda canlarından keçmiş qəhrəman vətən övladlarının ruhlarına dualar oxunub, ölkəmizdə sülh, sabitlik və əmin-amanlığın daim qorunması üçün dualar edilib.
Qeyd edək ki, təşkil olunan iftar süfrəsində şəhid ailələri, qazilər, ağsaqqallar və şəhər ictimaiyyətinin nümayəndələri üçün xüsusi süfrə açılıb və müqəddəs Ramazan ayının mənəvi dəyərləri birgə bölüşülüb.
Esmira Hidayətova, Mingəçevir
