Bu qarışımı keçmiş SSRİ-nin məşhur ürək cərrahı, akademik Nikolay Amosov hazırlayıb.

Qarışım vitamin və mikroelementlərlə zəngindir və ürək-damar sisteminin fəaliyyətinə dəstək verir. Onun hazırlanmasında quru meyvə, qoz və baldan istifadə edilir.

Bəs akademikdə bunu ərsəyə gətirmək fikri necə yaranıb?

N.Amosov əməliyyat etdiyi xəstələri müşahidə altına alıb. Bu zaman həkimə məlum olub ki, vaxtilə quru meyvə və qoz yeyən xəstələr daha sürətlə sağalır. Bundan sonra o, quru meyvələr, qoz, limon və baldan ibarət xüsusi qarışım hazırlamağa qərar verib.

Əməliyyatdan sonrakı dövrdə pastadan gündə 3 dəfə, yeməkdən 30 dəqiqə əvvəl 1 xörək qaşığı qəbul edilməsi tövsiyə olunur. Soyuqdəymənin profilaktikası məqsədilə isə gündə 2 dəfə 1 qaşıq qəbul edilməsi məqsədəuyğundur. Uşaqlar üçün isə 1 çay qaşığı kifayətdir.

İnsanlar bunu ev şəraitində də hazırlaya bilərlər.

Bunun üçün aşağıdakı ərzaqlar tələb olunur

-1 ədəd limon;

– 500 qram ərik qurusu;

– 500 qram qara gavalı;

– 500 qram kişmiş;

– 500 qram qoz;

– 500 qram əncir;

– 500 ml bal.

Hazırlanma qaydası

Quru meyvələrin hər biri ayrıca qaba qoyulur, üzərinə qaynar su əlavə edilərək təxminən 10 dəqiqə saxlanılır. Bu müddətdə limon qabığından və tumlarından təmizlənərək dilimlənir və blenderdə sıyıq halına gətirilir. Blender olmadıqda ətçəkəndən istifadə etmək mümkündür. Daha sonra qoz da blenderdə xırdalanır.

Quru meyvələr süzgəcə tökülərək suyu süzülür, ilıq su ilə yuyulur və blenderdə ayrı-ayrılıqda püre halına salınır.

Xırdalanmış quru meyvələr, limon və qoz dərin qaba əlavə edilir. Üzərinə bal tökülərək yaxşıca qarışdırılır.

Hazır qarışım bankalara doldurularaq qaranlıq və sərin yerdə saxlanılır.

Hamilələrin, allergik xəstəliyi olanların və şəkərli diabetdən əziyyət çəkənlərin qarışımdan istifadəsi tövsiyə olunmur. Xüsusilə xroniki xəstəliyi olan şəxslər həkimlə məsləhətləşməlidirlər.