Azərbaycan xalqının müstəqillik tarixində xüsusi əhəmiyyətə malik olan 15 İyun – Milli Qurtuluş Günü ölkəmizin dövlətçilik salnaməsində mühüm mərhələ kimi yadda qalmışdır. Bu əlamətdar gün xalqımızın taleyində dönüş nöqtəsi olmaqla yanaşı, müasir Azərbaycanın inkişaf yolunun əsasını təşkil edən siyasi sabitliyin, milli birliyin və dövlətçilik ənənələrinin möhkəmləndirilməsi baxımından müstəsna əhəmiyyət daşıyır.
XX əsrin sonlarında dövlət müstəqilliyini yenidən bərpa etmiş Azərbaycan ciddi siyasi, iqtisadi və sosial problemlərlə üz-üzə qalmışdı. Ölkədə hökm sürən qeyri-sabitlik, hakimiyyət böhranı, vətəndaş qarşıdurması təhlükəsi və xarici təzyiqlər dövlət müstəqilliyini ciddi şəkildə təhdid edirdi. Belə mürəkkəb və məsuliyyətli bir dövrdə xalqın təkidli tələbi ilə ümummilli lider Heydər Əliyevin hakimiyyətə qayıdışı Azərbaycanın xilası və gələcək inkişafı üçün tarixi zərurətə çevrildi.
1993-cü il iyunun 15-də Heydər Əliyevin Azərbaycan Respublikası Ali Sovetinin Sədri seçilməsi ölkənin siyasi həyatında yeni mərhələnin başlanğıcı oldu. Məhz həmin gündən etibarən Azərbaycanda dövlət quruculuğu prosesi sistemli şəkildə həyata keçirilməyə başladı, ictimai-siyasi sabitlik təmin edildi, milli həmrəylik möhkəmləndirildi və ölkənin gələcək inkişaf strategiyası müəyyənləşdirildi. Sonrakı illərdə həyata keçirilən islahatlar nəticəsində Azərbaycan regionun ən sürətlə inkişaf edən dövlətlərindən birinə çevrildi.
Milli Qurtuluş Günü yalnız tarixi hadisənin ildönümü deyil, həm də xalqın öz dövlətinə, müstəqilliyinə və milli dəyərlərinə sadiqliyinin ifadəsidir. Bu gün Azərbaycan Respublikasının Prezidenti cənab İlham Əliyevin rəhbərliyi ilə ölkəmiz qurtuluş ideyalarından qaynaqlanan uğurlu inkişaf yolunu davam etdirir, beynəlxalq aləmdə nüfuzunu daha da artırır və əldə etdiyi nailiyyətlərlə dövlətçilik tarixinin yeni səhifələrini yazır.
Milli Qurtuluş Günü hər bir azərbaycanlı üçün dövlət müstəqilliyinin qorunmasının, milli birliyin və vətəndaş həmrəyliyinin vacibliyini bir daha xatırladır. Bu əlamətdar gün münasibətilə bütün həmvətənlərimizi səmimi qəlbdən təbrik edir, ölkəmizə davamlı inkişaf, firavanlıq və əmin-amanlıq arzulayıram.
Hörmətlə,
T.Ü.FD. Anar Nadir oğlu İsmayılov
