“Real Madrid” klubu gələn mövsüm üçün heyətini iki futbolçu ilə gücləndirib.
Bu barədə tanınmış idman jurnalisti Fabritsio Romano özünün “X” sosial şəbəkə hesabında məlumat yayıb.
“Kral klubu” İngiltərənin “Liverpul” komandasının müdafiəçisi İbraima Konate və İtaliyanın “İnter” klubunun arxa xətt oyunçusu Denzel Dumfrislə müqavilə imzalayıb.
İ.Konate iyunun 30-da müddəti başa çatan müqaviləsindən sonra “Liverpul”u azad agent statusunda tərk edəcək. Fransız futbolçunun “Real Madrid”lə imzaladığı müqavilə 2030-cu ilə qədər nəzərdə tutulub.
27 yaşlı Konate 2021-ci ildən bəri “Liverpul”un şərəfini qoruyurdu. O, mersisaydlıların heyətində çıxdığı 183 matçda 7 qol və 4 məhsuldar ötürmə ilə yadda qalıb. Fransız oyunçu bu müddət ərzində İngiltərə çempionu (2025), iki dəfə İngiltərə Liqa Kuboku (2022, 2024), eləcə də bir dəfə ölkə kuboku (2022) və superkubokunun (2022) qalibi olub. Karyerası ərzində Almaniyanın “Leypsiq” və Fransanın “Soşo” klublarında da çıxış etmiş müdafiəçi, Fransa millisinin heyətində 2022-ci il dünya çempionatının gümüş, 2024-cü il Avropa çempionatının isə bürünc medallarını qazanıb.
30 yaşlı Dumfris isə 2021-ci ildən “İnter”in formasını geyinirdi. Niderlandlı müdafiəçi Milan təmsilçisi ilə iki dəfə İtaliya çempionluğu (2024, 2026), üç dəfə İtaliya Kuboku (2022, 2023, 2026) və üç dəfə İtaliya Superkubokunu (2021, 2022, 2024) başı üzərinə qaldırıb. O, “İnter”də keçirdiyi 207 oyunda 27 qol vurub və 28 məhsuldar ötürmə edib. Həmçinin, Dumfris komandası ilə iki dəfə Çempionlar Liqasının finalına qədər (2023, 2025) irəliləyə bilib. Futbolçu daha əvvəl ölkəsinin “Sparta”, “Herenven” və PSV klublarında da çıxış edib.
Qeyd edək ki, “Real Madrid” geridə qalan mövsümdə son 5 ildə ilk dəfə olaraq heç bir kubok qazana bilməyib. “Kral klubu” İspaniya çempionatını “Barselona”dan 8 xal geri qalaraq 2-ci yerdə başa vurub. Komanda İspaniya Kuboku ilə 1/16 final mərhələsində “Albasete”yə (2:3), Çempionlar Liqası ilə isə 1/4 finalda Almaniyanın “Bavariya” klubuna (iki oyunun nəticəsinə görə 4:6) məğlub olaraq vidalaşıb. İspaniya Superkubokunun finalında isə “Real Madrid” əzəli rəqibi “Barselona”ya boyun əyib (2:3).(oxu.az)
