Beynəlxalq Valyuta Fondunun (IMF) 2026-cı il proqnozlarına əsasən, alıcılıq qabiliyyəti paritetinə və adambaşına düşən ümumi daxili məhsula (ÜDM) görə Lixtenşteyn 195 min 372 dollarla zirvədəki mövqeyini qoruyub saxlayıb. Neft gəlirləri ilə sürətlə zənginləşən Qayana isə 95 min 477 dollarla ABŞ-ni geridə qoyub. Türkiyə isə dünyanın ən zəngin 20 iqtisadiyyatı sırasına daxil olmayıb.
IMF-in 2026-cı il proqnozlarına görə, adambaşına düşən iqtisadi istehsalına görə dünyanın ən varlı ölkəsi yenə də Lixtenşteyn olub. Avropanın kiçik ölkələrindən biri olan Lixtenşteyndə adambaşına düşən ÜDM alıcılıq qabiliyyəti paritetinə əsasən 195 min 372 dollar təşkil edib.
Lixtenşteyni 173 min 708 dollarla Sinqapur və 159 min 129 dollarla İrlandiya izləyib.
Dördüncü sırada 156 min 719 dollarla Lüksemburq, beşinci sırada isə 140 min 423 dollarla Makao qərarlaşıb.
İlk beşlikdəki ölkələrin əksəriyyətinin az əhalili olması və beynəlxalq ticarət, maliyyə və ya yüksək əlavə dəyər yaradan sahələrdə ixtisaslaşmış iqtisadiyyatlara malik olması diqqət çəkir.
Sinqapur 20 ildə 9-culuqdan 2-ciliyə yüksəlib
2006-cı ildə dünyanın ən zəngin ölkələri siyahısında 9-cu yerdə qərarlaşan Sinqapur, 2026-cı il proqnozlarında 2-ci pilləyə yüksəlib. Ölkədə adambaşına düşən ÜDM 2006-cı ildəki 59 min 942 dollardan 173 min 708 dollara çatıb.
Yarımkeçiricilər, əczaçılıq sənayesi, beynəlxalq ticarət və maliyyə kimi sahələrdə formalaşan güclü iqtisadi struktur bu yüksəlişdə əsas rol oynayıb.
İrlandiya üçüncü oldu
2006-cı ildə 49 min 519 dollarla 12-ci yerdə olan İrlandiya, 2026-cı il proqnozlarında 159 min 129 dollarla üçüncü sıraya çıxıb. Texnologiya, əczaçılıq və maliyyə şirkətlərinin fəaliyyəti bu böyüməyə təkan versə də, xarici kapitallı şirkətlərin mənfəətləri ÜDM rəqəmlərinə güclü təsir göstərdiyi üçün bu göstərici əhalinin real xərcləmə imkanlarının eyni səviyyədə olduğunu göstərmir.
Neft Qayananı zənginlər liqasına daşıdı: ABŞ-ni keçdi
2026-cı il sıralamasının ən diqqətçəkən ölkələrindən biri Cənubi Amerikadakı Qayana olub. 2019-cu ilin dekabrında neft hasilatına başlayan ölkə dənizdəki neft ehtiyatlarının iqtisadiyyata cəlb olunması ilə sürətli böyümə dövrünə qədəm qoyub.
Qayanada adambaşına düşən ÜDM 95 min 477 dollara çatıb. Beləliklə, ölkə 94 min 430 dollarlıq göstəriciyə malik ABŞ-ni geridə qoyaraq dünyanın ən zəngin 11-ci iqtisadiyyatı adını qazanıb. ABŞ isə sıralamada 12-ci yerdə qərarlaşıb.
Digər diqqətçəkən dəyişikliklər:
Qatar: 2006-cı ildə 3-cü yerdə olan ölkə, 2026-cı ildə 112 min 312 dollarla 7-ci pilləyə geriləyib.
Birləşmiş Ərəb Əmirlikləri (BƏƏ): 2006-cı ildə 4-cü yerdə olarkən, 2026-cı ildə 87 min 774 dollarla 14-cü sıraya düşüb.
Norveç: 2006-cı ildəki 11-ci yerdən 2026-cı ildə 6-cı sıraya yüksəlib (115 min 548 dollar).
2026-cı ilin ilk 10 ən zəngin ölkəsi (Adambaşına ÜDM – SGP, dollarla):
1 Lixtenşteyn 195.372
2 Sinqapur 173.708
3 İrlandiya 159.129
4 Lüksemburq 156.719
5 Makao 140.423
6 Norveç 115.548
7 Qətər 112.312
8 İsveçrə 105.680
9 Tayvan 98.051
10 Bruney 97.858
11 Qayana 95.477
12 ABŞ 94.430
13 Danimarka 89.667
14 BƏƏ 87.774
15 Niderland 87.773
16 San Marino 87.141
17 Hon-Konq 84.212
18 İslandiya 82.730
19 Malta 82.421
20 Səudiyyə Ərəbistanı 78.815
20 il əvvəl dünyanın ən varlı ölkələri hansılar idi?
1 Lixtenşteyn 112.499
2 Lüksemburq 96.014
3 Qətər 86.252
4 BƏƏ 74.230
5 Makao 69.437
6 Brunei 67.149
7 San Marino 63.401
8 Kuveyt 60.477
9 Sinqapur 59.942
10 İsveçrə 54.488
11 Norveç 53.542
12 İrlandiya 49.519
13 ABŞ 46.217
14 Danimarka 45.064
15 İslandiya 44.331
16 Niderland 43.358
17 Səudiyyə Ərəbistanı 42.595
18 Avstriya 42.341
19 Bəhreyn 41.276
20 Belçika 40.108